Ирандық Golrang Industrial Group компаниясы Қазақстанда май зауыты мен құс фабрикасын салу жобаларын жүзеге асырады

Қазақстан агроөнеркәсіптік кешендегі инвестициялық ынтымақтастықты кеңейтуді жалғастыруда. Шетелдік инвестицияларды тарту аясында ирандық Golrang Industrial Group компаниясымен екі ірі жобаны — май экстракциялау зауытын және ет бағытындағы құс фабрикасын салу бойынша келісімге қол жеткізілді.

Аталған келісімдер ауыл шаруашылығы вице-министрі Ермек Кенжеханұлының компания басшысы Фазли Мехди Мохаммадкариммен кездесу барысында жасалды. Жобаларға салынатын жалпы инвестиция көлемі шамамен 120 млн АҚШ долларын құрайды.

Golrang Industrial Group өкілдері Қазақстан аумағында бизнесті дамытуға стратегиялық қызығушылық танытатынын атап өтті. Қазіргі уақытта компания болашақ өндірістерді орналастыру үшін өңірлерді қарастыруда.

Бірінші жоба тәулігіне 3 мың тоннаға дейін күнбағыс өңдейтін май экстракциялау зауытын салуды көздейді. Бұл өндіріс үшін тікелей инвестиция көлемі шамамен 70 млн долларды құрайды. Жобаны іске асыру ауыл шаруашылығы шикізатын терең өңдеуді арттыруға және өнімнің қосылған құнын ұлғайтуға мүмкіндік береді.

Екінші бағыт — шамамен 50 млн доллар тұратын ет бағытындағы құс фабрикасын салу. Жоба өндіріс көлемін арттыруға және өнім сапасын жақсартуға бағытталған.

Ортақ жобаларды жүзеге асыру екіжақты ынтымақтастықтың нығаюы аясында жүргізілуде. 2025 жылдың қорытындысы бойынша Қазақстан мен Иран арасындағы агроөнеркәсіптік кешендегі тауар айналымы 55,8%-ға өсіп, 341 млн АҚШ долларынан асты. Бұл ретте бидай мен арпа сияқты дәнді дақылдардан тұратын қазақстандық экспорт шамамен екі есеге артты.

Кездесу қатысушылары бірлескен қайта өңдеу қуаттарын құру елдер арасындағы экономикалық байланыстарды нығайтудың маңызды кезеңі болатынын, сондай-ақ қайта өңдеу өнеркәсібін дамытуға және Қазақстанның аграрлық секторына жаңа технологияларды тартуға ықпал ететінін атап өтті.