04.11.2026, 00:06
Қазақстан жаңа өнім астығының экспортын 2,3 млн тоннаға дейін ұлғайтты
Қазақстан астығының Қытайға экспорттық жеткізілімі 2,6 есе, ал Ауғанстанға 1,9 есе артты
Қазақстан жаңа өнім астығын сыртқы нарықтарға жеткізу көлемін ұлғайтып келеді. «Қазақстан темір жолы» ҰК» АҚ мәліметінше, 2026 жылғы қыркүйек–қазан айларында экспортқа жөнелтілген астық көлемі 2 млн 262 мың тоннаны құрады. Бұл өткен маусымның сәйкес кезеңіндегі көрсеткіштен 2%-ға жоғары. Ол кезде шетелге 2 млн 219 мың тонна астық жөнелтілген болатын.
Экспорт көлемінің өсуі дәстүрлі өткізу нарықтарында да, жекелеген жаңа бағыттарда да байқалады. Дәстүрлі өткізу нарықтарына жеткізілімдер 1,2%-ға артып, 1,43 млн тоннаға жетті.
Атап айтқанда, Өзбекстанға астық экспорты 1,3%-ға ұлғайып, 1 млн 63 мың тоннаны құрады. Тәжікстанға жөнелтілімдер 19%-ға өсіп, 351 мың тоннаға жетті.
Қытай мен Ауғанстанға жеткізілімдерде анағұрлым жоғары өсім тіркелді. Есепті кезеңде Қытай Халық Республикасына астық экспорты 2,6 есе артып, 145 мың тоннадан 373 мың тоннаға дейін өсті. Ауғанстан бағытындағы жеткізілім көлемі 1,9 есе ұлғайып, 104 мың тоннадан 200 мың тоннаға жетті.
Сонымен қатар қазақстандық бидай экспортының оң динамикасы сақталуда. Мемлекеттік кірістер комитетінің мәліметіне сәйкес, 2026 жылғы қаңтар–қыркүйек айларында сыртқы нарықтарға 6,1 млн тонна бидай жеткізілді. Бұл 2025 жылдың сәйкес кезеңіндегі нәтижеден 15%-ға жоғары. Ол кезде экспорт көлемі 5,3 млн тоннаны құраған.
Қазақстандық бидайдың негізгі импорттаушылары Өзбекстан, Тәжікстан және Ауғанстан болып қала береді. Тоғыз ай ішінде Өзбекстанға жеткізілімдер 49%-ға артып, 3,8 млн тоннаға жетті. Тәжікстанға экспорт 13,6%-ға өсіп, 1 млн тоннаны құрады.
Аталған бағыттардың ішінде ең жоғары өсім Ауғанстанда тіркелді. Бұл елге 663 мың тонна бидай экспортталды. Өткен жылдың сәйкес кезеңімен салыстырғанда жеткізілім көлемі 3,4 есе ұлғайды.
Негізгі нарықтарға жөнелтілімдердің артуымен қатар Қазақстан бидай экспортының географиясын кеңейтуде. Атап айтқанда, Туниске 23,3 мың тонна, Францияға 6 мың тонна бидай жеткізілді. Сондай-ақ Иранға экспорт көлемінің айтарлықтай өскені байқалады. Бұл бағыттағы жеткізілім 67 мың тоннаға жетті.
Жаңа өнім астығын жеткізу көлемінің ұлғаюы және бидай экспортының өсуі шетелдік нарықтарда қазақстандық өнімге сұраныстың сақталып отырғанын және оның халықаралық саудадағы позициясының нығайып келе жатқанын көрсетеді.
