05.11.2026, 00:00
Азық-түлік корпорациясы Израильге 500 мың тоннаға дейін астықты ұзақ мерзімді негізде жеткізу мүмкіндігін қарастыруда
Иерусалимдегі келіссөздер барысында тараптар астық жеткізудің ықтимал бағыттарын, ауыл шаруашылығы өнімдері саудасын кеңейтуді және Қазақстанда израильдік агротехнологияларды енгізуді талқылады
Қазақстан мен Израиль ауыл шаруашылығы өнімдерінің өзара саудасын кеңейту және заманауи агротехнологиялар саласындағы ынтымақтастықты дамыту перспективаларын талқылады. Бұл мәселелер Иерусалимде өткен Сауда-экономикалық ынтымақтастық жөніндегі Қазақстан-Израиль үкіметаралық комиссиясының оныншы отырысында негізгі тақырыптардың бірі болды.
Отырыс барысында «Азық-түлік корпорациясы» ҰК» АҚ басқарма төрағасының орынбасары Самат Теңбаев Қазақстанның экспорттық мүмкіндіктері мен отандық агроөнеркәсіптік кешеннің әлеуетін таныстырды.
Қазақстан ауыл шаруашылығы өнімдерінің халықаралық нарықтарындағы қатысуын кеңейтуді жалғастыруда. Қазіргі уақытта отандық аграрлық өнімдер әлемнің 80-нен астам мемлекетіне жеткізіледі. Экспортты дамытудың басым бағыттарының қатарында Еуропа, Солтүстік Африка, Таяу Шығыс және Оңтүстік-Шығыс Азия елдері бар.
Ағымдағы жылғы мол өнім астықтың шетелге жеткізілімін ұлғайтуға қосымша мүмкіндік береді. Қазақстанда ақуыз бен желімше мөлшері жоғары азық-түліктік бидайдың едәуір қоры бар. Мұндай өнім сыртқы нарықтарда сұранысқа ие және Израильдің астық өңдеу кәсіпорындары үшін қызығушылық тудырады.
Самат Теңбаевтың хабарлауынша, Азық-түлік корпорациясы Израиль нарығының қажеттіліктеріне қарай 200 мыңнан 500 мың тоннаға дейін азық-түліктік бидайды, сондай-ақ ауыл шаруашылығы өнімдерінің басқа да түрлерін жеткізу жөнінде ұзақ мерзімді келісімдер жасасу мүмкіндігін қарастыруға дайын.
Экспорттық ынтымақтастықты кеңейтудің маңызды шарттарының бірі өнімді тасымалдауды ұйымдастыру болып қала береді. Ықтимал логистикалық шешімдердің қатарында Әзербайжан мен Грузия арқылы өтетін бағыт қарастырылуда. Сонымен қатар Балтық теңізі порттарын пайдалана отырып, жеткізудің балама нұсқаларын зерделеу ұсынылды.
Жеткізілімдерді ұлғайту перспективалары Израильдегі астық өнімдерін тұтыну көлемімен байланысты. Ел жыл сайын сыртқы нарықтардан 2 млн тоннадан астам бидай сатып алады. Бұдан бөлек, майлы дақылдарға, арпа мен жүгеріге тұрақты сұраныс сақталуда.
Импорттық қажеттіліктердің мұндай құрылымы Израильге жеткізілетін қазақстандық ауыл шаруашылығы өнімдерінің ассортиментін кеңейтуге және екіжақты сауда-экономикалық қатынастарды одан әрі дамытуға мүмкіндік береді.
Ынтымақтастық аясында ауыл шаруашылығында заманауи технологияларды қолдануға да ерекше назар аударылуда. Қазақстан агроөнеркәсіптік кешенді жаңғырту үшін, ең алдымен су ресурстары шектеулі жағдайда аграрлық өндірісті ұйымдастыру саласында Израиль тәжірибесін пайдалануға мүдделі.
Перспективалы бағыттардың қатарында су үнемдейтін суару технологияларын енгізу, тазартылған ағынды суларды қайта пайдалану, өндірістік процестерді цифрландыру және ауыл шаруашылығы өндірісін басқаруда жасанды интеллектіні қолдану бар.
Мұндай шешімдерді Қазақстанның табиғи-климаттық ерекшеліктерін ескере отырып пайдалану су ресурстарын ұтымды жұмсауға, өндірістік шығындарды азайтуға және аграрлық саланың өнімділігін арттыруға ықпал етуі мүмкін.
Қазақстанның Ауыл шаруашылығы министрлігі жаңа экспорттық бағыттарды игеру, отандық ауыл шаруашылығы өнімдерінің өткізу нарықтарын кеңейту және аграрлық саладағы халықаралық ынтымақтастықты нығайту жұмыстарын жалғастыруда.
