Ауыл шаруашылығын дамытудың кешенді жоспарының іске асырылуын бақылау күшейтілуде

2030 жылға дейінгі Мал шаруашылығын дамытудың кешенді жоспарын іске асыру мәселесі Ауыл шаруашылығы министрі Айдарбек Сапаровтың төрағалығымен өткен кеңестің негізгі тақырыбы болды. Кеңеске қаржы институттарының өкілдері, ҚР Ауыл шаруашылығы министрлігінің құрылымдық бөлімшелерінің басшылары және облыс әкімдерінің орынбасарлары қатысты.

Министрдің айтуынша, мемлекет мал шаруашылығын дамыту үшін қажетті қаржылық құралдардың толық пакетін қалыптастырған. Кешенді жоспар аясында «Игілік», «Береке» және «Жайлау» жеңілдетілген несие бағдарламалары жүзеге асырылуда. Сонымен қатар, саланың барлық бағыттары бойынша айналым қаражатын толықтыруға арналған жеңілдетілген қаржыландыру кеңейтілді.

Айдарбек Сапаров әлеуметтік-кәсіпкерлік корпорациялар арқылы жүзеге асырылатын бағдарламаларға қатысу шарттары фермерлердің ұсыныстары негізінде едәуір жеңілдетілгенін атап өтті. Осыған байланысты өңірлер жобаларды іріктеу сапасын арттырып, олардың іске асырылуға дайындығын мұқият бағалауы қажет.

Министрдің сөзінше, мемлекеттік қаражаттың тиімді пайдаланылуы мен жеңілдетілген несиелердің қайтарылуына облыс әкімдіктері жанындағы комиссиялар мен қаржы институттары жауапты болады. Қаржыландыру туралы шешім қабылданғанға дейін әрбір жоба ықтимал тәуекелдерді ескере отырып жан-жақты сарапталуы тиіс.

Ауыл шаруашылығы вице-министрі Аманғали Бердалиннің мәліметінше, өңірлерге 34,5 мың бас ауыл шаруашылығы жануарын сатып алуға 43 млрд теңге бөлінген.

Сонымен қатар, бірқатар облыстарда өтінімдерді қарау және жобаларды іске қосу қарқыны әлі де төмен. Осыған байланысты Айдарбек Сапаров жұмысты жеделдетуді, әрбір жобаны жеке сүйемелдеуді және жобаның іске асуға толық дайын екендігі расталмайынша мемлекеттік қаражат бөлмеуді тапсырды.

Кеңесте ірі егіншілік шаруашылықтарын мал шаруашылығын дамытуға тарту мәселесіне де ерекше назар аударылды. Бүгінде Қазақстанда жер көлемі 10 мың гектардан асатын, бірақ ауыл шаруашылығы жануарларын ұстамайтын 329 жер пайдаланушы бар. Аталған шаруашылықтардың толық өндірістік циклді қалыптастыруға жеткілікті жер және өндірістік әлеуеті бар екені атап өтілді.

Министр бұл бағыттағы жұмысты жандандыру Мемлекет басшысы мен Премьер-Министрдің тапсырмасы екенін еске салды. Осыған байланысты әкімдіктерге қысқа мерзім ішінде ірі жер пайдаланушылармен жұмысты күшейтіп, оларды мал шаруашылығын дамытуға тарту тапсырылды.

Кеңес барысында алдағы қысқы кезеңге дайындық мәселесі де қаралды. Өңірлердің мәліметіне сәйкес, бүгінгі күні 16 млн тонна мал азығы дайындалған. Дегенмен, кейбір облыстарда жемшөп дайындау қарқыны жоспарланған деңгейден төмен қалып отыр.

Кеңес қорытындысы бойынша Айдарбек Сапаров өңірлерге 2030 жылға дейінгі Мал шаруашылығын дамытудың кешенді жоспарын сапалы іске асыруды, инвестициялық жобаларды сүйемелдеуді күшейтуді және ірі жер пайдаланушыларды салаға тарту жұмыстарын жеделдетуді тапсырды. Сонымен қатар, өңірлерге жемшөп дайындау қарқынын арттыру, шабындық алқаптарды барынша тиімді пайдалану және малды қыстатуға қажетті қорды уақытылы қалыптастыру міндеті жүктелді.