30.04.2026, 01:01
Қазақстан мен Дания арасында сүтті мал шаруашылығын дамыту жөніндегі меморандумға қол қойылды
Тараптар асыл тұқымды ірі қара мал жеткізілімін кеңейту және Қазақстанның сүтті мал шаруашылығына озық технологияларды енгізу туралы келісімге келді
Қазақстан Республикасы Ауыл шаруашылығы вице-министрі Аманғалий Бердалин Дания Корольдігіне жұмыс сапары аясында екі ел арасындағы ынтымақтастықты дамытуға арналған қазақстандық-даттық дөңгелек үстелге қатысты.
Кездесу барысында мемлекеттік органдар, бизнес және салалық ұйымдар өкілдері сауда-экономикалық және инвестициялық байланыстарды кеңейту перспективаларын талқылап, ұзақ мерзімді әрі өзара тиімді серіктестікті дамытуға өзара қызығушылықтарын растады.
Тараптар агроөнеркәсіптік кешендегі өзара іс-қимылға, атап айтқанда сүтті мал шаруашылығын дамытуға ерекше назар аударды. Іс-шара барысында Қазақстанның инвестициялық мүмкіндіктері таныстырылып, қазақстандық және дат компанияларының жобалары ұсынылды.
Талқылау қорытындысы бойынша екі елдің іскер топтары үшін қызығушылық тудыратын ынтымақтастықтың негізгі бағыттары айқындалды. Практикалық нәтижелердің бірі ретінде «Дат голштині» асыл тұқымды қауымдастығы мен «QazaqSut» ірі қара малдың сүтті және аралас тұқымдарының республикалық палатасы арасында меморандумға қол қойылды.
Құжат Даниядан жоғары өнімді асыл тұқымды ірі қара малды тұрақты жеткізуді ұйымдастыруды, сондай-ақ Қазақстанның сүтті мал шаруашылығына даттың озық технологияларын енгізуді көздейді. Аталған бағыт өзінің тиімділігін дәлелдеді: 2011–2025 жылдар аралығында елге дат селекциясындағы 10 780 бас асыл тұқымды ірі қара мал әкелінді.
2026 жылдың басынан бастап жеткізілімдер жаңа инвестициялық жобалар мен саланы дамыту бағдарламалары аясында жалғасуда.
Кездесу қорытындыларына қатысты пікір білдірген Аманғалий Бердалин қол жеткізілген келісімдер мен қол қойылған меморандум Қазақстан мен Дания арасындағы практикалық ынтымақтастықты тереңдетудің маңызды кезеңі болатынын және агроөнеркәсіптік әріптестіктің технологиялық дамуына қосымша серпін беретінін атап өтті.
Жұмыс сапары аясында вице-министр Данияның Азық-түлік, ауыл шаруашылығы және балық шаруашылығы министрлігінің, сондай-ақ Данияның ауыл шаруашылығы және азық-түлік кеңесінің басшылығымен келіссөздер жүргізді.
Тараптар сүтті мал шаруашылығында заманауи дат технологияларын енгізу перспективаларын, соның ішінде жоғары өнімді асыл тұқымды сүтті ірі қара малды импорттау жоспарларын талқылады. Сонымен қатар ветеринариялық қауіпсіздік, ауыл шаруашылығы өнімдерін терең өңдеу, өзара сауданы кеңейту және Қазақстанның аграрлық секторына дат инвестицияларын тарту мәселелеріне ерекше назар аударылды.
Сондай-ақ инновациялық технологияларды трансферлеу, өндірісті локализациялау және сүтті мал шаруашылығы саласында құзырет орталықтарын құру мәселелері қарастырылды. Бұл бағыттар өнімділікті арттыруға, фермаларды басқарудың заманауи әдістерін енгізуге және саланың кадрлық әлеуетін дамытуға бағытталған.
Сапар барысында Аманғалий Бердалин DanBred, FOSS, Kongskilde Industries, Vilomix, Viking Genetics, Caspian Advisory және Kurt Nisgaard Asp компанияларының өкілдерімен кездесті. Бұл компаниялар Қазақстан аумағында бірлескен инвестициялық жобаларды жүзеге асыруға қызығушылық танытты.
