14.04.2026, 23:42
Үкімет аграрлық секторды қолдау шараларын кеңейтуде
Астық тасымалын қосымша қаржыландыру және несиелік қолдаудың жаңа тетіктері саланың тұрақтылығын арттыруға бағытталған
Премьер-министр Олжас Бектенов агроөнеркәсіптік кешенді қолдауды күшейтуді тапсырды, оның ішінде астық тасымалын қосымша қаржыландыру және қарыз қаражаттарына қолжетімділікті кеңейту қарастырылған.
Атап айтқанда, Қаржы және Ауыл шаруашылығы министрліктеріне астық тасымалына байланысты шығындарды жабу үшін қосымша қаражат бөлу мәселесін пысықтау тапсырылды.
Сондай-ақ мал шаруашылығы мен өсімдік шаруашылығында қарыздарды кепілдендіру тетігін енгізу аясында Ауыл шаруашылығы, Қаржы, Ұлттық экономика министрліктеріне «Бәйтерек» холдингімен бірлесіп қаржыландыру көздерін айқындау және қажетті қаражат көлемін қамтамасыз ету тапсырылды.
Премьер-министр аграршылар үшін қаржылық ресурстардың қолжетімділігін арттыру қажеттігін атап өтті. Осы мақсатта әлеуметтік-кәсіпкерлік корпорацияларға АӨК субъектілерін инвестициялық мақсаттарға және айналым қаражатын толықтыруға қаржыландыру өкілеттігін беру ұсынылды.
Осыған байланысты Ауыл шаруашылығы және Ұлттық экономика министрліктеріне Бәсекелестікті қорғау және дамыту агенттігімен бірлесіп екі апта мерзімінде Үкімет қаулысына тиісті өзгерістер енгізу тапсырылды.
