06.03.2026, 11:16
Қазақстанда сүтті мал шаруашылығын ұзақ мерзімді дамыту стратегиясы әзірленуде
Бағдарлама жобасы өнімділікті арттыруға, өндірісті жаңғыртуға және инвестицияларды көбейтуге бағытталған
Біріккен Ұлттар Ұйымының Азық-түлік және ауыл шаруашылығы ұйымы (ФАО) Қазақстан Республикасы Ауыл шаруашылығы министрлігімен бірлесіп семинар өткізді. Іс-шара барысында Қазақстанда сүтті мал шаруашылығын ұзақ мерзімді дамыту бағдарламасын әзірлеуге қолдау көрсетуге бағытталған TCP/KAZ/4001 жобасының нәтижелері таныстырылды.
Жоба ФАО-ның техникалық қолдауымен жүзеге асырылды және Қазақстанның сүт секторындағы бәсекеге қабілеттілікті, өнімділікті және инвестициялық тартымдылықты арттыруға бағытталған. Сонымен қатар саланы дамыту халықаралық озық тәжірибелермен және ауыл шаруашылығының ұлттық басымдықтарымен үйлестіріледі.
Семинар барысында қатысушыларға Қазақстандағы сүт саласының қазіргі жағдайына және оның өндірістік-өткізу тізбегіне жүргізілген кешенді талдаудың нәтижелері таныстырылды.
Сондай-ақ сүтті мал шаруашылығын ұзақ мерзімді дамыту бағдарламасының жобасы ұсынылды. Оның ішінде бағдарламаны іске асыруға арналған іс-қимыл жоспары және салаға инвестиция тарту жөніндегі жол картасы таныстырылды.
Талқылаулар барысында сүт өндірісінің тұрақты өсімін қамтамасыз етуге, өндірісті жаңғыртуға және саланың тиімділігін арттыруға қажетті басым шараларға ерекше назар аударылды. Қатысушылар өндірістік-өткізу тізбегін нығайту, өнімділікті арттыру және сүт саласына инвестиция тартуға қолайлы жағдай жасау мәселелері бойынша пікір алмасты.
Қазақстан Республикасы Ауыл шаруашылығы министрлігі Мал шаруашылығы департаменті директорының орынбасары Қайрат Көшеновтің айтуынша, сүт секторын ұзақ мерзімді дамыту бағдарламасын әзірлеу елдің азық-түлік қауіпсіздігін нығайту және отандық мал шаруашылығының бәсекеге қабілеттілігін арттыру жолындағы маңызды қадам болып табылады. Оның айтуынша, ФАО-ның техникалық қолдауы саланың қазіргі жағдайын жан-жақты бағалауға және тұрақты өсімді ынталандыру, өндірісті жаңғырту және инвестиция тарту бойынша негізгі басымдықтарды анықтауға мүмкіндік берді.
Өткен семинар ұсынылған стратегиялық құжаттарды талқылау, пікір алмасу және ұсынылған шаралардың өзектілігін растау алаңына айналды. Талқылау нәтижелері бағдарламаны одан әрі жетілдіруге және оның тиімді жүзеге асуына ықпал етеді. Бұл өз кезегінде Қазақстандағы сүтті мал шаруашылығының тұрақты әрі ұзақ мерзімді дамуын қамтамасыз етеді.
