Қазақстанда БРК қолдауымен астықты терең өңдеу жобасы жүзеге асырылуда

«Қазақстанның Даму Банкі» АҚ («Бәйтерек» холдингінің еншілес ұйымы) және «Kazak Protein» ЖШС Астанада интеграцияланған агроөнеркәсіптік кешен салу жобасын іске асыру үшін кредиттік желі ашу туралы келісімге қол қойды. Жаңа нысан дәнді және бұршақты дақылдарды терең өңдеуге бағытталады.

БРК мәліметінше, жобаның жалпы құны 175,7 млрд теңгені құрайды. Қаржыландыру бастамашының өз қаражаты және банк заемы есебінен жүзеге асырылады, сондай-ақ қосымша қолдау «Даму» қорының кепілдігі арқылы көрсетіледі. Банк қаражаты технологиялық жабдықтарды сатып алуға және орнатуға бағытталады.

Жоба Қазақстан Үкіметі бекіткен 17 басым бастаманың тізіміне енгізілген және жоғары қосылған құны бар өнімдерді дамытуға, импортқа тәуелділікті азайтуға және тұрақты экспорттық әлеуетті қалыптастыруға бағытталған.

Жоба толық қуатына шыққаннан кейін кәсіпорын жылына 250 мың тоннаға дейін бидай және 80 мың тонна бұршақ өңдей алады, жоғары технологиялық тағамдық ингредиенттер мен терең өңдеу өнімдерінің кең спектрін өндіреді.

Кешен өнімі ішкі нарықта да, экспортта да сұранысқа ие болады деп күтілуде, ал экспорттық түсім жылына 100 млрд теңгеден асады.

Жобаны іске асыру негізгі позициялар бойынша импортты іс жүзінде толық алмастыруға мүмкіндік береді: лизин, модификацияланған бидай крахмалдары, бұршақ ақуызы изоляты және бұршақ крахмалы бойынша 100%. Бұл ішкі нарықтың сыртқы жеткізілімдерге тәуелділігін айтарлықтай төмендетіп, елдің азық-түлік қауіпсіздігін арттырады.

Кәсіпорында жасанды интеллект элементтері мен биотехнологияларды қоса алғанда, заманауи технологиялық шешімдер енгізіледі. Бұл өндірістік процестердің тиімділігін арттыруға, шикізат шығындарын азайтуға және халықаралық стандарттарға сәйкес өнім сапасының тұрақтылығын қамтамасыз етуге мүмкіндік береді.

БРК басқарма төрағасы Марат Елибаевтың айтуынша, мұндай жобаларды қолдау банктің экономиканы әртараптандыру және капиталсыйымды өндірістерді дамыту жөніндегі стратегиялық бағытына сәйкес келеді. Оның сөзінше, Kazak Protein жобасы өңір экономикасына ұзақ мерзімді мультипликативтік әсер беретін, Орталық Азияда терең өңдеудің жаңа стандарттарын қалыптастыратын және АҚШ нарығына шығуды қоса алғанда, жаңа экспорттық мүмкіндіктер ашатын жоғары технологиялық активке айналады.

Сонымен қатар кешеннің іске қосылуы логистика, жем өндірісі және тамақ өнеркәсібі сияқты байланысты салалардың дамуына ықпал етеді, сондай-ақ отандық ауыл шаруашылығы өндірушілерінің өніміне тұрақты сұраныс қалыптастырады.