26.08.2026, 00:15
Қостанай облысының аграршылары астықты тексеру тарифтерін қайта қарауды ұсынды
Қаңтар айынан бастап сараптама жүргізу үшін астық сынамалары әрбір көлік құралынан алынады
Қостанай облысының Кәсіпкерлер палатасында агроөнеркәсіптік кешен мәселелері жөніндегі салалық кеңестің отырысы өтті. Негізгі тақырыптардың бірі ауыл шаруашылығы өнімдеріне карантиндік фитосанитариялық сараптама жүргізу қызметтерінің құнын есептеудің қолданыстағы тәртібін талқылау болды.
Ағымдағы жылдың қаңтар айынан бастап рәсімді өткізу тәртібі өзгерді. Кәсіпкерлер палатасында түсіндіргендей, енді ауыл шаруашылығы өнімдерін импорттау кезінде мамандар әрбір автокөліктен астық сынамаларын алады. Бұған дейін зерттеу өнімнің бүкіл партиясына жүргізілетін.
Бір фитосанитариялық сараптаманың құны шамамен 25 мың теңгені құрайды. Әрбір көлік құралына жеке зерттеу жүргізу қажеттілігіне байланысты өнімді тасымалдау кезінде ауыл шаруашылығы кәсіпорындарының шығындары артып отыр.
Отырыста ведомствоның ұстанымын ҚР АШМ АӨК МИК «Фитосанитария» ШЖҚ РМК Қостанай облыстық филиалының директоры Марат Баймағамбетов таныстырды.
Оның айтуынша, қолданыстағы тетік карантиндік объектілер анықталған жағдайда бизнестің мүддесін қорғауға мүмкіндік береді. Егер нақты бір автокөліктен карантиндік объект анықталса, әкелінетін партияның барлығы емес, тек сол көлікте болған және зерттеуден өткен астық көлемі ғана жойылуға жатады.
Аграрлық бизнес өкілдері, өз кезегінде, қызметтердің құнын қалыптастырудың қолданыстағы тәсілімен келіспейтіндерін білдірді. Ауыл шаруашылығы тауарын өндірушілер сараптама жүргізу тарифтерін төмендету және оларды монополияға қарсы заңнамаға сәйкес қатаң реттеуді қамтамасыз ету қажет деп санайды.
Талқылау қорытындысы бойынша Қостанай облысының Кәсіпкерлер палатасы Табиғи монополияларды реттеу және бәсекелестікті қорғау комитетінің департаментіне ресми сауал жолдау туралы шешім қабылдады.
Өтініште қолданыстағы тетікке құқықтық баға беру және карантиндік фитосанитариялық сараптама жүргізу қызметтерінің құнын қалыптастыру заңдылығына қатысты түсініктеме беру сұралады.
