16.09.2026, 00:48
«Кең дала 2» бағдарламасы бойынша өтінім қабылдау 1 қазанда басталады
Ауыл шаруашылығы тауарын өндірушілерге жылдық 5% мөлшерлемемен қаражат АКК, банктер, кредиттік серіктестіктер және ӘКК арқылы қолжетімді болады
«Аграрлық несие корпорациясы» АҚ 2026 жылғы 1 қазаннан бастап «Кең дала 2» бағдарламасы аясында 2027 жылғы көктемгі егіс және егін жинау жұмыстарын қаржыландыруға өтінім қабылдауды бастайды. Ауыл шаруашылығы тауарын өндірушілер үшін сыйақы мөлшерлемесі жылдық 5%-ды құрайды.
«Кең дала 2» бағдарламасы бойынша ерте қаржыландыру тетігін Аграрлық несие корпорациясы алғаш рет 2024 жылдың соңында іске қосты. Соның арқасында ауыл шаруашылығы тауарын өндірушілер алдағы маусымға алдын ала дайындалып, негізгі шығындарын егіс жұмыстары басталғанға дейін жоспарлау мүмкіндігіне ие болды.
2027 жылғы маусымға дайындық барысында бұл тәсіл жалғасын табады. Өтінім қабылдау 2026 жылғы 1 қазанда басталады, бұл аграршыларға қажетті қаражатты алдын ала тартуға мүмкіндік береді.
Ерте қаржыландыруды ауыл шаруашылығы тауарын өндірушілер бүкіл өндірістік циклге дайындалу үшін пайдаланады. Алынған қаражат қажетті ресурстарды сатып алуға, техниканы жөндеуге және алдағы дала жұмыстарына жұмсалатын шығындарды жоспарлауға бағытталады.
Бағдарлама жұмыс істеген уақыт ішінде ұсынылатын қаржыландыру көлемі айтарлықтай өсті. 2025 жылдың қорытындысы бойынша ауыл шаруашылығы тауарын өндірушілер «Кең дала 2» бағдарламасы аясында, ерте қаржыландыру тетігін қоса алғанда, 501,5 млрд теңге алды.
2026 жылғы маусымда берілген қаражат көлемінің өсуі жалғасты. 16 қыркүйектегі жағдай бойынша аграршыларға 664,4 млрд теңге берілді.
Сонымен қатар қаржыландыру алу мүмкіндіктері кеңеюде. Бағдарлама бойынша өтінім беріп, қаражатты екінші деңгейдегі банктер, кредиттік серіктестіктер және әлеуметтік-кәсіпкерлік корпорациялар арқылы алуға болады. Сондай-ақ қаржыландыру «Аграрлық несие корпорациясы» АҚ филиалдық желісі арқылы тікелей қолжетімді.
