10.09.2026, 00:32
Қазгидромет астықты өңірлердегі егістіктің жай-күйі туралы хабарлады
Елдің солтүстігінде жаздық дәнді дақылдардың жағдайы негізінен жақсы және өте жақсы деп бағалануда
Тамыздың үшінші онкүндігінде Қазақстанның негізгі астықты өңірлерінде дәнді дақылдардың басым бөлігі толық пісу кезеңіне жетті, осыған байланысты аграршылар егін жинауға кірісті.
Осы кезеңде ауа температурасы негізінен климаттық норма шегінде болды. Солтүстік, орталық және шығыс өңірлерде жауын-шашын мөлшері норма шамасында немесе одан жоғары болса, елдің батысы мен солтүстік-батысында жауын-шашын нормадан аз түсті.
Солтүстік өңірлерде жаздық бидай мен жаздық арпа негізінен толық пісу кезеңінде болды. Жекелеген учаскелерде балауызданып пісу кезеңі байқалды. Жаздық дәнді дақылдар егістігінің жағдайы негізінен жақсы және өте жақсы, ал жекелеген учаскелерде қанағаттанарлық деп бағалануда.
Қазақстанның батысы мен солтүстік-батысында жаздық дәнді дақылдар да негізінен толық пісу кезеңіне жетті.
Шығыс өңірлерде өсімдіктердің жағдайы жақсы және өте жақсы деп бағалануда.
Елдің орталық бөлігінде егістіктің жағдайы негізінен жақсы. Сонымен қатар Қарқаралы ауданының жекелеген учаскелерінде, Бүркітті агропосты маңында егістіктің жағдайы нашар деп бағаланды.
Қазақстанның шығысы мен солтүстігіндегі күнбағыс егістіктерінде «пісу — жинау пісімділігі» кезеңі жалғасуда. Көп жағдайда өсімдіктердің жағдайы жақсы және өте жақсы, жекелеген учаскелерде қанағаттанарлық деп сипатталады.
Топырақтағы өнімді ылғал қорының аспаптық өлшеу нәтижелері бойынша негізгі солтүстік астықты өңірлерде — Қостанай, Ақмола, Солтүстік Қазақстан және Павлодар облыстарында — топырақтың бір метрлік қабатындағы ылғалмен қамтамасыз етілу көрсеткіштері қанағаттанарлық және оңтайлы деңгейде болды.
Сонымен қатар іс жүзінде барлық өңірлерде топырақтың жоғарғы жыртылатын қабатының кебуі байқалды.
