21.10.2026, 23:56
СҚО-да пайдаланылмаған 1,9 мың гектар жайылым мемлекет меншігіне қайтарылды
Аққайың ауданында жер заңнамасының бұзылғаны анықталып, жер ресурстарын басқару департаменті сотқа жүгінді
Солтүстік Қазақстан облысының Аққайың ауданында жалпы ауданы 1,9 мың гектар болатын ауыл шаруашылығы мақсатындағы жер учаскесі мемлекет меншігіне қайтарылды. Жерді мәжбүрлеп алып қоюға жайылымдық алқаптардың нысаналы мақсатына сай пайдаланылмауы негіз болды.
Заң бұзушылық Қазақстан Республикасы Ауыл шаруашылығы министрлігі Жер ресурстарын басқару комитетінің жер ресурстарын басқару департаменті жүргізген тексеру барысында анықталды.
Қазақстанның жер заңнамасына сәйкес, шаруа немесе фермер қожалығын жүргізу, сондай-ақ ауыл шаруашылығы өндірісін жүзеге асыру үшін берілген жер учаскелері заңда белгіленген тәртіппен мәжбүрлеп алып қойылуы мүмкін. Мұндай шара жердің пайдаланылмау фактісі алғаш анықталған сәттен бастап бір жыл ішінде учаске нысаналы мақсатына сай пайдаланылмаған жағдайда қолданылады.
Анықталған заң бұзушылықты жою және жер учаскесін мемлекет меншігіне қайтару мақсатында департамент Солтүстік Қазақстан облысының мамандандырылған ауданаралық экономикалық сотына жерді мәжбүрлеп алып қою туралы тиісті талап арыз жолдады.
Сот талқылауының қорытындысы бойынша жер ресурстарын басқару департаментінің талаптары толық көлемде қанағаттандырылды. Нәтижесінде жалпы ауданы 1,9 мың гектар болатын жер учаскесі мемлекетке қайтарылды.
Қазақстанда пайдаланылмай жатқан ауыл шаруашылығы мақсатындағы жерлерді анықтау және оларды қолданыстағы заңнамаға сәйкес мемлекет меншігіне қайтару жұмыстары жалғасуда.
