17.11.2026, 00:08
Солтүстік Қазақстан облысы дәнді дақылдардың өнімділігі бойынша көш бастады
Өңір аграрийлері 4,9 млн тонна астық жинады, ал ауыл шаруашылығына тартылған инвестициялар көлемі 170,2 млрд теңгеге жетті
2026 жылғы егін жинау науқанының қорытындысы бойынша Солтүстік Қазақстан облысы Қазақстанның астық егетін өңірлері арасында өнімділік бойынша көш бастады. Облыс әкімдігінің хабарлауынша, өңірдің ауыл шаруашылығы тауарын өндірушілері гектарынан орта есеппен 17 центнер өнім алып, 4,9 млн тонна астық жинады.
Өңірдегі ауыл шаруашылығының жалпы өнім көлемі 697,1 млрд теңгеге жетті, ал аграрлық салаға тартылған инвестициялар көлемі 170,2 млрд теңгені құрады. Соңғы екі жылда облыста 44 инвестициялық жоба іске асырылды.
СҚО ауыл шаруашылығының қарқынды дамып келе жатқан бағыттарының бірі – сүтті мал шаруашылығы. Солтүстік Қазақстан облысының тәжірибесін республика көлемінде тарату нәтижесінде сүт-тауар фермаларын құру бойынша 71 жоба іске асырылды. Олардың жиынтық өндірістік қуаты жылына 462 мың тонна сүтті құрайды.

