12.11.2026, 00:31
Тимур Турлов Қазақстанның агробизнесіне 300 млн доллар инвестиция салуды жоспарлап отыр
Turlov Private Holding инвестициялық компаниясы 22 ауыл шаруашылығы кәсіпорны мен алты элеваторды біріктіретін «Қазақстанның астық консорциумы» холдингінің бас компаниясындағы кемінде 51% үлесті сатып алуға ниетті
Freedom Holding Corp. компаниясының негізін қалаушы әрі басшысы Тимур Турлов Қазақстанның аграрлық секторына инвестиция салу мүмкіндігін қарастыруда. Қаржы холдингінің америкалық реттеуші органға жолдаған хабарламасына сәйкес, 2026 жылғы 5 қарашада Турлов пен оған тиесілі Turlov Private Holding (TPH) жеке инвестициялық компаниясы «Қазақстанның астық консорциумы» ЖШС-нің негізгі иесі Бахтияр Оспановпен ниет туралы келісімге қол қойды. Бұл туралы Forbes.kz хабарлайды.
Болжамды мәміленің құны 300 млн долларды құрайды. Қол жеткізілген уағдаластықтарға сәйкес, Turlov Private Holding «Қазақстанның астық консорциумы» холдингінің бас компаниясы болып табылатын Ak Zhaiyk Capital компаниясының кемінде 51% үлесін сатып алуды жоспарлап отыр. Қалған 49% үлес «Бәйтерек» ұлттық холдингінің Qazaqstan Investment құрылымына кіретін Kokzhiyek Fund LP қорында сақталады.
Тараптар қол қойған ниет туралы келісімнің (Heads of Terms) міндетті заңдық күші жоқ. Мәмілені аяқтау активтерге кешенді тексеру (due diligence) жүргізілгеннен және түпкілікті шарттарға қол қойылғаннан кейін ғана мүмкін болады.
Мәміле аяқталғанға дейін агрохолдингтің күнделікті қызметін басқаруды Бахтияр Оспанов жалғастырады. Алайда негізгі стратегиялық шешімдерді Turlov Private Holding компаниясымен алдын ала келісу қажет болады. Атап айтқанда, бұл бюджеттерді бекітуге, егіс науқанын дайындау мен өткізуге, соның ішінде егіс алқаптарының құрылымын анықтауға, тұқым, тыңайтқыш және жанар-жағармай материалдарын сатып алуға, сондай-ақ дала жұмыстарын қаржыландыруға қатысты. Сонымен қатар басшылық қызметтерге кадр тағайындау, күрделі инвестициялар салу және қарыз қаражатын тарту мәселелері де келісуге жатады.
«Қазақстанның астық консорциумы» Ақмола және Солтүстік Қазақстан облыстарында орналасқан 22 ауыл шаруашылығы кәсіпорны мен алты элеваторды біріктіреді. Агрохолдингтің жалпы жер қоры 909,9 мың гектарды құрайды, оның 350 мың гектары егістікке пайдаланылады. Жыл сайын өндірілетін ауыл шаруашылығы өнімдерінің көлемі 500 мың тоннадан асады.
Қазіргі уақытта «Қазақстанның астық консорциумы» компаниясының 99% үлесі Ak Zhaiyk Capital компаниясына тиесілі. Қалған 1% үлес Бахтияр Оспановтың тікелей меншігінде. 2026 жылы кәсіпкер 95 млн долларлық дәулетімен Қазақстанның ең бай бизнесмендері рейтингінде 75-орынға ие болды. Аграрлық бизнестен бөлек, оның құрылыс және металлургия салаларындағы компанияларда да үлестері бар.
Әлеуетті сатып алушы — Freedom Holding Corp. компаниясынан тәуелсіз қызмет ететін Тимур Турловтың жеке инвестициялық құрылымы Turlov Private Holding. Бизнесменнің дәулеті 5,2 млрд долларға бағаланады. Қазақстанның ең бай және ең ықпалды кәсіпкерлері рейтингінде ол алтыншы орында тұр.
