11.11.2026, 00:09
Ресейде 35 млн тоннадан астам майлы дақыл жиналды
Егін жинау жұмыстары жоспарланған алқаптардың 93%-ында аяқталды, ал өнім көлемінің ең жоғары өсімі күнбағыс бойынша тіркелді — 27,9%
Ресейде майлы дақылдарды жинау жұмыстары жалғасуда. Қазіргі уақытта жоспарланған алқаптардың шамамен 93%-ында егін жинау аяқталып, жиналған өнімнің жалпы көлемі 35,4 млн тоннаға жетті. Бұл көрсеткіш өткен жылдың сәйкес кезеңіндегі нәтижеден айтарлықтай жоғары. Бұл туралы Ресей Федерациясының Ауыл шаруашылығы министрлігінің деректеріне сілтеме жасап, ТАСС агенттігі хабарлады.
Өнім көлемінің ең жоғары өсімі күнбағыс бойынша байқалды — 27,9%. Бұл дақылдың жалпы түсімі 19 млн тоннадан асты. 2026 жылғы егін жинау науқанының қазіргі кезеңіндегі нәтижелер бойынша күнбағыстың ең көп көлемі Орынбор, Саратов және Ростов облыстарында жиналды. Орынбор облысында 2 млн тонна, Саратов облысында 1,85 млн тонна, ал Ростов облысында 1,65 млн тонна күнбағыс бастырылды.
Ресейде рапс жинау көлемі 6,8 млн тоннаны құрады, бұл өткен жылғы көрсеткіштен 17,3%-ға жоғары. Өндіріс көлемі бойынша Алтай өлкесі көш бастап тұр, мұнда 500,6 мың тонна өнім жиналды. Одан кейін 487 мың тонна көрсеткішпен Орел облысы және 466,3 мың тонна рапс бастырылған Краснояр өлкесі орналасқан.
Соя өсіретін өңірлер арасында Амур облысы дәстүрлі түрде жетекші орнын сақтап келеді. Қазіргі уақытта бұл өңірде 1,4 млн тонна соя жиналды. Ірі өндірушілердің алғашқы үштігіне сондай-ақ 681,8 мың тонна өнім алған Курск облысы және 642,1 мың тонна көрсеткішке жеткен Алтай өлкесі кірді.
