18.11.2026, 00:05
Қазақстанда аграрийлерді жеңілдетілген қаржыландыру көлемі 1,2 трлн теңгеге жетті
2026 жылдың он айында ауыл шаруашылығының жалпы өнім көлемі 5,2%-ға өсіп, 8,9 трлн теңгеге жетті, ал субсидия түріндегі мемлекеттік қолдаумен 25 мыңға жуық шаруашылық қамтылды
Қазақстанда 2026 жылғы қаңтар–қазан айларының қорытындысы бойынша ауыл шаруашылығының жалпы өнім көлемі 5,2%-ға артып, 8,9 трлн теңгеге жетті. Саланы мемлекеттік қолдаудың негізгі шаралары өндіріс көлемін ұлғайтуға, ауыл шаруашылығы техникасы паркін жаңғыртуға және ауыл шаруашылығы тауарын өндірушілердің қаржы ресурстарына қолжетімділігін кеңейтуге бағытталған. Бұл туралы Үкімет отырысында ауыл шаруашылығы министрі Айдарбек Сапаров мәлімдеді.
Ведомство басшысының айтуынша, мемлекеттік субсидиялармен 25 мыңға жуық шаруашылық қамтылған, бұл шағын және орта ауыл шаруашылығы тауарын өндірушілердің шамамен 90%-ын құрайды. Субсидиялау аясында аграрийлердің тұқым, тыңайтқыштар, өсімдіктерді қорғау құралдары мен ауыл шаруашылығы техникасын сатып алуға жұмсаған нақты шығындарының бір бөлігі өтеледі.
Мемлекеттік қолдау қаражатын бөлу кезінде ашықтықты арттыру мақсатында субсидиялаудың ақпараттық жүйесін жаңғырту жұмыстары жүргізілуде.
2026 жылы ауыл шаруашылығы тауарын өндірушілерді жеңілдетілген несиелеу көлемі 1,2 трлн теңгеге жетті. Қарыз қаражатының қолжетімділігін арттыру мақсатында қаржыландырудың алты арнасы жұмыс істейді. Кепілдік қамтамасыз етуі жеткіліксіз шаруашылықтар үшін қарыздарға кепілдік беру тетігі қарастырылған.
Сонымен қатар Қазақстанда 1 қазаннан бастап 2027 жылғы ауыл шаруашылығы маусымын ерте қаржыландыруға өтінімдер қабылдау басталды.

