22.10.2026, 00:58
Солтүстік Қазақстан облысында дәнді және дәнді-бұршақты дақылдарды жинау жұмыстары аяқталды
Орташа өнімділік 17 ц/га құрады, ал өңірдің астық қоймаларына 1,5 млн тоннадан астам астық түсті
Солтүстік Қазақстан облысының аграрийлері дәнді және дәнді-бұршақты дақылдарды жинау жұмыстарын толық аяқтады. Ауыл шаруашылығы тауарын өндірушілер жоспарланған алқаптардың 100%-ынан өнім жинады. Олардың жалпы ауданы шамамен 2,9 млн гектарды құрады. Орташа өнімділік гектарына 17 центнерге жетті.
Өңірдің астық қоймаларына 1,5 млн тоннадан астам астық түсті. Жиналған өнімнің негізгі бөлігін үшінші және төртінші сыныпты астық құрайды.
Астық жинау науқанын аяқтаумен қатар, облыстың ауыл шаруашылығы тауарын өндірушілері мал азығының негізгі түрлерін дайындауды да аяқтады. Майлы дақылдар егілген алқаптардағы жинау жұмыстары да аяқталуға жақын.
Сонымен қатар өңірде келесі ауыл шаруашылығы маусымына дайындық жүргізілуде. 20 қазандағы жағдай бойынша аграрийлер келесі жылғы егіс науқанына 487 мың тонна тұқым дайындап, сақтауға қойды.
