11.09.2026, 00:08
ЕАЭО-да ауыл шаруашылығы өнімдеріне қойылатын фитосанитариялық талаптар өзгереді
Өзгерістер көкөніс өнімдеріне қойылатын талаптарды, фитосанитариялық бақылауды және ағаш қаптама материалдарын ресімдеуді қамтиды
Еуразиялық экономикалық одақта ауыл шаруашылығы өнімдерінің жекелеген түрлеріне қатысты қолданылатын карантиндік фитосанитариялық талаптарды өзгерту жоспарланып отыр. Тиісті шешім Еуразиялық экономикалық комиссия Кеңесінің отырысында қабылданды, деп хабарлады Қазақстан Үкіметінің баспасөз қызметі.
Отырыс барысында ЕАЭО елдерінің аграрлық саласын реттейтін бірқатар құжаттарға өзгерістер енгізу мақұлданды. Атап айтқанда, ауыл шаруашылығы дақылдарының сорттық егістерін далалық апробациялау әдісін түзету көзделген.
Сондай-ақ Еуразиялық экономикалық одаққа мүше мемлекеттердің кедендік шекарасы мен аумағындағы карантинге жатқызылған өнімдер мен объектілерге қолданылатын Бірыңғай карантиндік фитосанитариялық талаптарға өзгерістер енгізіледі.
Шешімдердің бірі қызанақ, бұрыш және баялды зақымдайтын пепино мозаикасы вирусына қатысты фитосанитариялық шараларды қолдануға байланысты. Елде карантиндік фитосанитариялық қауіпсіздіктің жеткілікті деңгейі қамтамасыз етілген жағдайда, мұндай өнімдерде аталған вирустың болмауы жөніндегі талапты алып тастау ұсынылады.
Сонымен қатар ЕАЭО мемлекеттерінің кедендік шекарасы мен аумағында фитосанитариялық бақылауға жататын карантинге жатқызылған өнімдердің тізбесі түзетіледі.
Өзгерістер ағаш қаптама және бекіту материалдарына да қатысты. Еуразиялық экономикалық одақтың бірыңғай талаптарына сәйкес келетін таңбалау болған жағдайда, мұндай материалдарға фитосанитариялық сертификатты міндетті түрде ресімдеу талабы алынып тасталады.
Еуразиялық экономикалық комиссияда қабылданған шаралар карантиндік фитосанитариялық талаптарды қолдануды оңтайландыруға және одаққа мүше мемлекеттердің аумағында тиісті өнімдерді өндіру мен саудалау үшін неғұрлым қолайлы жағдай қалыптастыруға бағытталғанын атап өтті.
ЕЭК Кеңесінің отырысында Қазақстан кәсіпорындарының қатысуымен ЕАЭО аясындағы жаңа кооперациялық жобалар да мақұлданды. Мұндай жобалар үшін қарыздар бойынша пайыздық мөлшерлемелерді субсидиялау есебінен жеңілдетілген қаржыландыру қарастырылған.
Бұған дейін, 2025 жылы, осы тетік аясында Ақмола облысында ауыл шаруашылығы техникасын өндіру жөніндегі кооперациялық жоба мақұлданған болатын.
