19.10.2026, 01:19
Қазақстан, Өзбекстан, Ауғанстан, Пәкістан және Иран көлік дәлізін дамытуды талқылады
Келіссөздер барысында негізгі назар маршрутты келісуге, жүк базасын қалыптастыруға және халықаралық инвесторларды тартуға аударылды
«NEW SILK WAY» халықаралық бизнес-форумы аясында Қазақстан, Өзбекстан, Ауғанстан, Пәкістан және Иран өкілдері Трансауған көлік дәлізін одан әрі дамыту және бірлескен инфрақұрылымдық бастамаларды іске асыру мәселелері бойынша келіссөздер жүргізді.
Кездесуге Қазақстанның көлік министрі Нұрлан Сауранбаев, Ауғанстан темір жолдары басқармасының бас директоры Абдул Карим Фатех, Өзбекстан Көлік министрлігінің Көлік және логистика мәселелерін зерттеу орталығының директоры Бекзод Холматов, Пәкістан Байланыс министрлігінің федералдық хатшысы Али Шер Мехсуд, сондай-ақ Иранның жолдар және қала құрылысы министрі Фарзане Садег қатысты.
Талқылаудың негізгі тақырыбы «Орталық Азия – Оңтүстік Азия» (CASA) теміржол дәлізін салу жобасын іске асыру болды. Оны құру Орталық, Оңтүстік және Батыс Азия мемлекеттері арасындағы көлік байланыстарын дамытуға, жүк тасымалы бағыттарын кеңейтуге және халықаралық нарықтар мен теңіз порттарына шығудың қосымша мүмкіндіктерін қамтамасыз етуге бағытталған.
Келіссөздерге қатысушылар жобаны дайындау барысын және оны іс жүзінде жүзеге асырудың негізгі мәселелерін қарастырды. Атап айтқанда, болашақ теміржол желісінің маршрутын келісу, көлік инфрақұрылымын дамыту және тасымалдарды қамтамасыз ету үшін жүк базасын қалыптастыру мәселелері талқыланды.
Жобаның қаржылық аспектілері талқылаудың жеке бағыты болды. Тараптар қаржыландырудың ықтимал тетіктерін, инвесторлар мен халықаралық қаржы институттарын тарту перспективаларын, сондай-ақ Қазақстан, Өзбекстан, Ауғанстан және Пәкістан арасындағы өзара іс-қимылды күшейту мәселелерін қарастырды.
Қазақстанның көлік министрі Нұрлан Сауранбаев кездесу қатысушылары Трансауған көлік дәлізін одан әрі дамытуға және CASA теміржол жобасын іске асыруға ортақ мүдделіліктерін растағанын атап өтті.
Оның айтуынша, маңызды міндеттердің бірі — бастаманы талқылаудан нақты практикалық қадамдарға көшу. Жобаны іске асыру өңірлер арасында қосымша көлік қатынасын құруға, транзиттік мүмкіндіктерді арттыруға, жүк тасымалын кеңейтуге және мүдделі мемлекеттердің сауда-экономикалық ынтымақтастығын нығайтуға мүмкіндік береді.
