14.10.2026, 01:05
Қазақстандағы жаңа сүт-тауар фермалары жыл соңына дейін жобалық қуатының 70%-ына шығуы тиіс
Үкімет өңірлерге асыл тұқымды мал шаруашылығын дамыту жұмыстарын күшейтуді және жеңілдетілген кредиттеу қаражатын тиімді пайдалануды қамтамасыз етуді тапсырды
Қазақстанда агроөнеркәсіптік кешеннің басым міндеттері айқындалды. Олардың қатарында егін жинау науқанын белгіленген мерзімде аяқтау, мал шаруашылығы саласын дамыту және сүт өндіру көлемін ұлғайту бар.
Ауыл шаруашылығы мәселелерін қарау барысында биыл жоғары сапалы астық алу күтілетіні атап өтілді. Астықтың сақталуын қамтамасыз ету, сондай-ақ ішкі және сыртқы нарықтардың сұранысын қанағаттандыру үшін облыс әкімдіктеріне Ауыл шаруашылығы министрлігімен бірлесіп, қолда бар элеваторлар мен қойма үй-жайларын барынша пайдалану тапсырылды.
Жаңа сүт-тауар фермаларының жұмысына ерекше назар аударылды. Премьер-министр Олжас Бектенов ағымдағы жылдың соңына дейін пайдалануға берілген нысандарда сүт өндіру көлемін жобалық қуатының кемінде 70%-ына жеткізу міндетін қойды.
Үкімет басшысы ауыл шаруашылығы жануарларының генетикалық әлеуетін арттыру үшін асыл тұқымды мал басын көбейтудің маңыздылығын да атап өтті. Сонымен қатар ол өңірлік әкімдіктердің бұл бағыттағы белсенділігі жеткіліксіз екенін айтты.
Жергілікті атқарушы органдарға Мал шаруашылығын дамытудың кешенді жоспары аясындағы жеңілдетілген кредиттеу бағдарламаларына бөлінген қаржының мақсатты пайдаланылуын және тиімді игерілуін қамтамасыз ету тапсырылды.
Бұдан бөлек, отырыста сусындар өндірісіндегі жағдай қаралды. Бұл салада ұзақ уақыт бойы өнім шығару қарқынының төмендеуі байқалып отыр.
Осыған байланысты Ауыл шаруашылығы министрлігіне сусындар өндірісін ұлғайтудың қосымша мүмкіндіктерін анықтау және саладағы жағдайды тұрақтандыруға бағытталған тиімді шараларды әзірлеу тапсырылды.
