Қазақстан мен Камбоджа ауыл шаруашылығы өнімдерінің саудасын кеңейтуді талқылады

Қазақстан мен Камбоджа ауыл шаруашылығы өнімдерінің өзара саудасын ұлғайту, экспорттық жеткізілімдерді кеңейту, сондай-ақ қайта өңдеу және инвестициялар саласындағы бірлескен бастамаларды жүзеге асыру мүмкіндіктерін қарастыруда. Екіжақты ынтымақтастықтың перспективаларын Қазақстанның ауыл шаруашылығы министрі Айдарбек Сапаров пен Камбоджа Корольдігінің ауыл шаруашылығы, орман шаруашылығы және балық шаруашылығы министрі Дит Тина талқылады.

Келіссөздер барысында Айдарбек Сапаров Қазақстанның аграрлық әріптестікті дамытуға мүдделі екенін атап өтті. Оның айтуынша, елде астық пен ет өнімдерінің экспортын ұлғайтуға қажетті шикізат базасы мен өндірістік қуаттар бар. Жаңа өткізу нарықтарын игеру, сауда қатынастарын нығайту және өзара тиімді жобаларды ілгерілету басым бағыттар болып қала береді.

Кездесуде дәнді дақылдар саудасын дамыту перспективаларына ерекше назар аударылды. Қазақстан бұл салада айтарлықтай экспорттық әлеуетін сақтап отыр. Соңғы екі жыл қатарынан елдегі жалпы астық түсімі 27 млн тоннадан асып келеді.

Өткен маркетингтік жылдың қорытындысы бойынша Қазақстан 15,3 млн тонна астық экспорттады, бұл алдыңғы жылдың сәйкес кезеңіндегі көрсеткіштен 70%-ға жоғары. Қол жеткізілген көлем соңғы 20 жылдағы ең жоғары көрсеткіш болды.

Қолда бар өндірістік мүмкіндіктерді ескере отырып, қазақстандық тарап Камбоджа нарығына бидай жеткізуді ұйымдастыру мүмкіндігін қарастыруды ұсынды. Бұл бағытты пысықтау кезінде импорттаушылар тарапынан сұраныс, астық сапасына қойылатын талаптар және көлік логистикасының ерекшеліктері ескерілмек.

Келіссөздердің тағы бір тақырыбы ет өнімдерінің экспортын дамыту болды. Екі елдің өкілдері Қазақстанда өндірілген сиыр және қой етін, оның ішінде халал стандарттарына сәйкес келетін өнімдерді жеткізу мүмкіндіктерін талқылады.

Камбоджаның ауыл шаруашылығы, орман шаруашылығы және балық шаруашылығы министрі Дит Тина өз елінің Қазақстаннан ауыл шаруашылығы тауарларын сатып алу көлемін ұлғайтуға мүдделі екенін растады. Атап айтқанда, алма мен ет импорты туралы сөз болды. Сонымен қатар кездесуге қатысушылар балық өсіру саласындағы сауда ынтымақтастығын кеңейту мүмкіндіктерін атап өтті.

Камбоджа тарапы келіссөздер барысында айқындалған бағыттар бойынша жұмысты жалғастыруды және қол жеткізілген уағдаластықтарды ынтымақтастық туралы меморандуммен бекітуді ұсынды. Дит Тинаның айтуынша, өткен кездесу аграрлық өнімдердің өзара саудасын одан әрі дамытуға мүмкіндік бар екенін көрсетті.

Алдағы бірлескен жұмысты ұйымдастыру үшін Айдарбек Сапаров екіжақты жұмыс тобын құруды ұсынды. Оның міндеттеріне өзара жеткізілімдердің шарттарын келісу, ауыл шаруашылығы тауарларының Қазақстан мен Камбоджа нарықтарына қол жеткізу мәселелерін қарастыру, сондай-ақ өндірушілер мен импорттаушылар арасында тікелей іскерлік байланыстар орнатуға жәрдемдесу кіреді.

Бұдан бөлек, жұмыс тобы ауыл шаруашылығы шикізатын қайта өңдеу және инвестициялар тарту салаларында бірлескен жобаларды жүзеге асыру мүмкіндіктерін зерделеумен айналысады.

Келіссөздер нәтижесінде Қазақстан мен Камбоджа өкілдері келісілген бағыттар бойынша өзара іс-қимылды жалғастыру ниетін растады. Негізгі назар аграрлық сауданы кеңейтуге және бірлескен бастамаларды іс жүзінде пысықтауға аударылады.