11.09.2026, 00:38
Қазақстанда 107 тонна өнімді әкелу және транзиттеу тоқтатылды
«Сырым» ветеринариялық бекетінде бидай кебегі мен ет өнімдерін тасымалдау кезінде заң бұзушылықтар анықталды
Батыс Қазақстан облысындағы «Сырым» ветеринариялық бақылау бекетінде ветеринариялық заңнаманы бұза отырып, бақылауға жататын өнімдерді тасымалдаудың екі дерегі тоқтатылды. Кері қайтарылған жүктердің жалпы көлемі 107 тоннаны құрады.
Заң бұзушылықтарды ҚР Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің аумақтық инспекциясының қызметкерлері мемлекеттік ветеринариялық-санитариялық инспекторлармен бірлесіп анықтады.
Бірінші жағдайда Шешен Республикасынан Түркістан облысы мен Шымкент қаласына бағытталған 88 тонна бидай кебегін әкелу тоқтатылды. Тексеру барысында жүктің ветеринариялық ілеспе құжаттары мен таңбалауы жоқ екені анықталды. Сонымен қатар өнім қажетті термиялық өңдеуден өтпеген.
Тағы бір заң бұзушылық 19 тонна сүйексіз сиыр еті мен ет жартылай фабрикаттарын транзиттеу кезінде анықталды. Өнім Беларусь Республикасының Минск облысынан Ташкентке тасымалданған.
2026 жылғы 24 ақпаннан бастап Қазақстанның Ауыл шаруашылығы министрлігі қолайсыз эпизоотиялық жағдайға байланысты Ресей Федерациясының жекелеген облыстары арқылы тиісті өнімдерді әкелуге және транзиттеуге уақытша шектеулер енгізді.
Тексеру қорытындысы бойынша барлық 107 тонна өнім жөнелту пункттеріне кері қайтарылды. Тасымалдаушыларға қатысты ҚР Әкімшілік құқық бұзушылық туралы кодексінің 406-бабы бойынша әкімшілік хаттамалар толтырылып, айыппұлдар салынды. Сондай-ақ тасымалдаушылармен ЕАЭО-ның ветеринариялық-санитариялық талаптарын сақтау мәселелері бойынша түсіндіру жұмыстары жүргізілді.
Жыл басынан бері «Сырым» ветеринариялық бақылау бекетінде барлығы 230 заң бұзушылық тіркелді. Жөнелту пункттеріне 230 автокөлік кері қайтарылды. Анықталған фактілер бойынша 100 әкімшілік хаттама толтырылып, салынған айыппұлдардың жалпы сомасы 8,9 млн теңгеге жетті.
ҚР Ауыл шаруашылығы министрлігі тасымалдаушылар мен сыртқы экономикалық қызметке қатысушыларды қолданыстағы ветеринариялық-санитариялық талаптарды, сондай-ақ қажетті ілеспе құжаттарды ресімдеу қағидаларын сақтауға шақырды.
