08.10.2026, 00:09
Қазақстан Оманға жылына 500 мың тоннаға дейін астық экспорттауға дайын
Ақуыз бен желімшесі жоғары қазақстандық бидай экспорттық ынтымақтастықтың бағыттарының біріне айналуы мүмкін
Астанада өткен Қазақстан–Оман іскерлік форумында «Азық-түлік келісімшарт корпорациясы» ҰК» АҚ басқарма төрағасы Асылхан Джувашев астық саласындағы ынтымақтастықты кеңейту жөнінде ұсыныстарын таныстырды. Атап айтқанда, қазақстандық астықты Оманға тікелей жеткізуді ұйымдастыру, жаңа логистикалық бағыттарды дамыту және Қазақстан аумағында стратегиялық астық қорларын қалыптастыру мәселелері қаралды.
Іскерлік форум Оман Сұлтаны Хайсам бен Тарик Әл Саидтың Президент Қасым-Жомарт Тоқаевтың шақыруымен 5–6 қазанда Қазақстанға жасаған мемлекеттік сапары аясында өтті.
Іс-шара барысында Қазақстан мен Оман өкілдері агроөнеркәсіптік кешен, логистика, мұнай-газ және химия өнеркәсібі, сондай-ақ инфрақұрылымды дамыту салаларындағы өзара іс-қимыл перспективаларын талқылады.
Форум қатысушылары алдында сөз сөйлеген Асылхан Джувашев Қазақстанның Оманның азық-түлікке деген қажеттілігін қамтамасыз ету мүмкіндіктерін атап өтті. Оның айтуынша, Продкорпорацияның тұрақты астық ресурстары 2 млн тоннадан асады.
Ұлттық астық операторы Оман Сұлтанатына астықты тікелей экспорттауды ұйымдастыруға мүдделі және жыл сайын 200 мыңнан 500 мың тоннаға дейін астық жеткізу жөнінде ұзақ мерзімді келісімдер жасасу мүмкіндігін қарастыруға дайын.
Продкорпорация басшысы қазақстандық бидайдың сапасына ерекше назар аударды. Ағымдағы маусымда елде ақуыз бен желімше мөлшері жоғары hi-pro санатындағы жоғары сапалы бидайдан мол өнім алынды.
Компания омандық сатып алушыларға осындай бидайды тұрақты түрде жеткізуді ұйымдастыруға дайын екенін білдірді. Сонымен қатар нарық қажеттіліктеріне қарай басқа да дәнді дақылдарды экспорттау бойынша ынтымақтастық орнатуға болады.
Өзара іс-қимылдың тағы бір бағыты бірлескен инвестициялық жобаларды жүзеге асыру болуы мүмкін. Асылхан Джувашев Оманның мемлекеттік органдары, инвестициялық құрылымдары мен азық-түлік компанияларының өкілдеріне Қазақстанда астық хабын құру мүмкіндігін қарастыруды ұсынды.
Осы бастама аясында Оман Сұлтанатының қажеттіліктерін қамтамасыз етуге арналған стратегиялық резервтік астық қорын қалыптастыру да ұсынылып отыр.
Мұндай ынтымақтастық форматы қажетті астық қорларын алдын ала тікелей өндіруші ел — Қазақстан аумағында жинақтауға мүмкіндік береді деп болжануда. Астықты нарықтағы ең қолайлы кезеңдерде сатып алып, кейін Оман тарапының қажеттілігіне қарай жөнелтуді ұйымдастыруға болады.
Продкорпорация басшысының бағалауынша, мұндай тетікті құру Оманға азық-түлік жеткізу көздерін әртараптандыруға және ұлттық азық-түлік қауіпсіздігін нығайтуға мүмкіндік береді.
Екі ел арасындағы ынтымақтастықтың перспективалары көлік-логистикалық инфрақұрылымды дамытумен де байланысты. Оманның логистикалық мүмкіндіктерін пайдалану қазақстандық ауыл шаруашылығы өнімдерінің Оңтүстік Азия мен Шығыс Африка нарықтарына шығуы үшін қосымша бағыттар ашуы мүмкін.
Өз кезегінде Оманның теңіз порттарын пайдалану Орталық Азия мен Парсы шығанағы елдері арасындағы азық-түлік жеткізілімдерінің сенімділігін арттыруға мүмкіндік береді.
