Қазақстан Моңғолияға ауыл шаруашылығы өнімдерінің экспортын ұлғайтуды көздеп отыр

Қазақстан Моңғолия нарығына ауыл шаруашылығы өнімдерін жеткізуді кеңейтуге дайын. Бұл туралы ҚР Ауыл шаруашылығы министрі Айдарбек Сапаров Моңғолия Премьер-Министрінің орынбасары Нямтайширын Номтойбаярмен кездесуі барысында мәлімдеді.

Аграрлық ведомство басшысының айтуынша, екі ел арасындағы ауыл шаруашылығы өнімдерінің тауар айналымы тұрақты түрде өсіп келеді. 2026 жылдың бірінші тоқсанының қорытындысы бойынша өзара сауда көлемі 10%-ға артқан. Қазақстан тарапы астық, ұн, күнбағыс майы, күріш және жеміс-көкөніс өнімдерінің экспортын ұлғайтуға дайын екенін білдірді.

Тараптар агроөнеркәсіптік кешендегі ынтымақтастықтың негізгі бағыттарын талқылады. Кездесуде өзара сауданы дамыту, логистикалық инфрақұрылымды жетілдіру, аграрлық ғылым саласындағы өзара іс-қимыл, сондай-ақ ветеринариялық және фитосанитариялық бақылау мәселелері қаралды.

Нямтайширын Номтойбаяр Моңғолияның Қазақстанды аграрлық саладағы маңызды әрі перспективалы серіктес ретінде қарастыратынын атап өтті. Оның айтуынша, екі елді сауда, логистика және өңіраралық ынтымақтастықты қамтитын ортақ мүдделердің кең ауқымы байланыстырады. Моңғолия тауар айналымын ұлғайтуға, тұрақты көлік-логистикалық бағыттарды дамытуға және өңіраралық байланыстарды нығайтуға мүдделі. Ол жоспарланған бастамаларды жүзеге асыру үшін жүйелі бірлескен жұмыстың маңыздылығын атап өтті.

Келіссөздер барысында фитосанитариялық қауіпсіздік пен өсімдіктер карантині мәселелеріне ерекше назар аударылды. Екі елдің құзырлы органдары ынтымақтастық туралы меморандум жобасын келісуді жалғастыруда. Құжат фитосанитариялық жағдай туралы ақпарат алмасуды, карантиндік зиянды организмдерді анықтау және диагностикалау бойынша іс-қимылдарды үйлестіруді, сондай-ақ бақылау саласындағы нормативтік талаптарды үйлестіруді көздейді.

Сонымен қатар Қазақстан тарапы тұқым шаруашылығы саласында, оның ішінде дәнді дақылдар өндірісі бойынша бірлескен жобаларды іске асыру мүмкіндігін қарастыруды ұсынды.