03.12.2025, 18:43
Қазақстан алғаш рет Алжирге 390 мың тонна бидай жөнелтті
Қазақстан бидайының Алжир нарығына алғашқы ірі жеткізілімі
2025 жылдың қаңтар–қараша айлары аралығында Қазақстан Алжирге алғаш рет ірі көлемде бидай экспорттады — жалпы 390 мың тонна, құны 100 миллион АҚШ долларынан асты. Бұл туралы ҚР Сыртқы істер министрлігі хабарлады.
Ведомствоның мәліметінше, мұндай нәтижеге 2025 жылғы көлік шығындарын субсидиялау және алжирлік мемлекеттік құрылымдармен белсенді өзара іс-қимыл ықпал еткен. Жыл бойы Қазақстанның Алжирдегі Елшілігі отандық ауыл шаруашылығы өнімдерін сыртқы нарықтарға ілгерілету жөніндегі Мемлекет басшысының тапсырмасын орындау аясында келіссөздер жүргізді.
Маңызды қадамдардың бірі — қаңтар айында Қазақстанның Алжирдегі Елшісі Ануарбек Ахметовтің Алжирдің астық және бұршақ дақылдарын орталықтандырылған сатып алуды үйлестіретін Алжир Аралық салалық астық кеңсесінің (OAIC) бас директоры Насреддин Мессауди мырзамен кездесуі болды. Қазақстан тарапы «Продкорпорация» Ұлттық компаниясы ұсынған бидай үлгілері мен зертханалық талдау нәтижелерін тапсырды. СІМ мәліметінше, OAIC басшысы қазақстандық бидай сапасын оң бағалап, сатып алуға қызығушылық білдірді.
Бұдан кейін, маусым айында, елші Алжирдің ауыл шаруашылығы министрі Юсеф Шерфамен кездесті. Министр Қазақстанмен аграрлық ынтымақтастықты дамытуға, соның ішінде астық жеткізілімдеріне қолдау көрсететінін айтты.
Алжир әлемдегі ең ірі бидай импорттаушылардың бірі болып қала береді — ел жыл сайын 9 млн тоннаға дейін жұмсақ бидай сатып алады. Барлық импорттық сатып алулар OAIC арқылы орталықтандырылған және халықаралық тендерлер негізінде жүзеге асырылады.
СІМ Қазақстанның Алжирге бидайдан бөлек ет, бұршақ дақылдары және басқа да ауыл шаруашылығы өнімдерін экспорттау әлеуетіне ие екенін де атап өтті.
Алжир тарапынан қызығушылық сақталған жағдайда, Қазақстан бұл бағытта тұрақты қатысуды қалыптастырып, OAIC болашақ тендерлері аясында өнім түрлерін кеңейте алады.
