22.05.2026, 00:57
Қазақстанда контейнерлік тасымал көлемі өсіп келеді
Өсім экспорттық, импорттық және транзиттік тасымалдардың ұлғаюымен, сондай-ақ елдің заманауи логистикалық инфрақұрылымының дамуымен қамтамасыз етілуде
Қазақстанда контейнерлік тасымалдар көлемінің өсуі жалғасуда. Көлік министрлігінің мәліметінше, 2025 жылдың қорытындысы бойынша контейнерлердегі жүк тасымалының көлемі 2024 жылғы 2115 мың ЖФЭ-ден 2203 мың ЖФЭ-ге дейін артқан. Осы кезеңде контейнерлендіру деңгейі 6,7%-дан 8%-ға дейін өсті.
Оң динамика биыл да сақталуда. 2026 жылдың қаңтар–сәуір айларында контейнерлік тасымал көлемі 742 мың ЖФЭ-ні құрады, ал 2025 жылдың сәйкес кезеңінде бұл көрсеткіш 709 мың ЖФЭ болған. Контейнерлендіру деңгейі 8,2%-дан 8,5%-ға дейін өсті.
Көлік министрлігінде өсім экспорттық, импорттық және әсіресе транзиттік контейнерлік тасымалдардың артуымен қамтамасыз етілгенін атап өтті. Ведомствоның пікірінше, бұл заманауи логистикалық шешімдердің дамуын және елдің транзиттік әлеуетінің күшеюін көрсетеді.
Сондай-ақ Мемлекет басшысының 2025 жылғы 8 қыркүйектегі Жолдауын іске асыру аясында контейнерлік және мультимодальды тасымалдарды дамытуға бағытталған бағдарламалық құжат әзірленетіні хабарланды.
Құжат терминалдық инфрақұрылымды дамыту, цифрлық сервистерді кеңейту, кедендік және технологиялық рәсімдерді жеңілдету, сондай-ақ контейнерлік операцияларды басқарудың бірыңғай жүйесін қалыптастыру жөніндегі шараларды қамтиды.
Аталған бастамаларды іске асыру жүк контейнерлендіру деңгейін арттыруға, логистика саласының тиімділігін күшейтуге және Қазақстанның өңірдегі негізгі көлік-логистикалық хаб ретіндегі рөлін нығайтуға мүмкіндік береді деп күтілуде.