10.06.2026, 01:16
Қазақстанда инвесторларды қолдау мен олардың құқықтарын қорғаудың жаңа тетіктері енгізіледі
Экспорттық және импортты алмастыру әлеуеті жоғары жаңа инвестициялық жобаларды қалыптастыруға ерекше назар аударылады
Қазақстанда инвесторлармен өзара іс-қимылдың тиімділігін арттыру және олардың құқықтарын қорғауды күшейту мақсатында қосымша шаралар қабылдануда. Бұл туралы Орталық коммуникациялар қызметінде өткен брифингте Ұлттық экономика вице-министрі Арман Қасенов мәлімдеді.
Негізгі бағыттардың бірі ретінде инвестиция тартудың шетелдік инфрақұрылымын кеңейту көзделіп отыр. Әлемнің ірі инвестициялық орталықтарында инвесторлар мен перспективалы жобаларды сүйемелдейтін фронт-офистер қызметін атқаратын өкілдіктер ашу жоспарлануда.
Сонымен қатар даму институттарын реформалау жалғасуда. Арман Қасеновтің айтуынша, «Бәйтерек» холдингінің құрылымында төрт салалық инвестициялық дирекцияны біріктіретін Инвестициялық қызмет құрылды. Оның басты міндеті – өңірлердің қажеттіліктерін ескере отырып сапалы инвестициялық жобаларды әзірлеу және оларды кейіннен Kazakh Invest компаниясына беру.
Бұдан бөлек, Kazakh Invest базасында инвесторларды қолдаудың бірыңғай орталығы – Kazakhstan Investment House құрылады. Жаңа құрылым «бір терезе» қағидаты бойынша қызметтердің толық кешенін ұсынатын болады.
Жаңа инвестициялық бастамаларды қалыптастыруға ерекше көңіл бөлінуде. Бизнес қауымдастығымен бірлесіп импортты алмастыру және экспортты дамыту әлеуеті жоғары бағыттар айқындалуда. Сонымен қатар инвесторларға нарықтар, инфрақұрылым, ресурстық база және мемлекеттік қолдау шаралары туралы жан-жақты ақпарат ұсынуды көздейтін «инвестицияларға тапсырыс» тетігі жетілдірілуде.
Жоспарланған өзгерістер қатарында әлеуметтік-кәсіпкерлік корпорацияларды өңірлік даму институттарына айналдыру, арнайы экономикалық және индустриялық аймақтарды жаңғырту, сондай-ақ инвестициялық салада цифрлық құралдарды одан әрі енгізу қарастырылған.
Вице-министрдің айтуынша, Ұлттық цифрлық инвестициялық платформаның функционалы кеңейтіледі. Бұл жүйе жобаларды іске асыру барысын нақты уақыт режимінде бақылауға және туындайтын мәселелерге жедел әрекет етуге мүмкіндік береді.
Инвесторлардың құқықтарын қорғауды күшейту мақсатында Бас прокуратура жанынан дауларды сотқа дейін реттеуге арналған арнайы алаң құрылады. Сонымен қатар әрбір өңірде инвесторларға құқықтық қолдау көрсететін және инвестициялық жобаларды сүйемелдейтін инвестициялық прокурорлар жұмыс істейтін болады.