23.07.2026, 23:26
Қазақстаннан астық пен ұн экспорты 13 млн тоннадан асты
Экспорт көлемінің артуына Орталық Азия елдері мен Ауғанстан тарапынан қазақстандық өнімге сұраныстың өсуі ықпал етті
2025 жылғы қыркүйектен 2026 жылғы 17 шілдеге дейін Қазақстан астық баламасында 13,5 млн тонна астық пен ұн экспорттады. Бұл туралы «Қазақстан темір жолы» ҰК» АҚ хабарлады.
Өткен маусымның сәйкес кезеңімен салыстырғанда экспорт көлемі 12,5%-ға өсті. Бір жыл бұрын астық пен ұнның астық баламасындағы экспорты 12 млн тоннаны құраған.
Экспорт өсімінің негізгі үлесі Орталық Азиядағы дәстүрлі өткізу нарықтары мен Ауғанстанға тиесілі болды.
Өзбекстанға 5,6 млн тонна өнім жөнелтіліп, бұл өткен маусымның сәйкес кезеңімен салыстырғанда 37%-ға көп болды. Қырғызстанға экспорт 1,4 есеге өсіп, 504 мың тоннаға жетті. Ауғанстанға жеткізілім 59%-ға артып, 2,2 млн тоннаны, ал Түрікменстанға экспорт 34%-ға өсіп, 210 мың тоннаны құрады.
Компанияның мәліметінше, тасымал көлемінің оң динамикасы қазақстандық ауыл шаруашылығы өнімдеріне сұраныстың жоғары екенін көрсетеді. Сонымен қатар бұл экспорттық логистиканы дамыту және шетелдік серіктестермен сауда-экономикалық ынтымақтастықты кеңейту бағытында қабылданған шаралардың тиімділігін дәлелдейді.
