18.08.2026, 00:41
Қазақстан әлемдік тыңайтқыштар нарығына шығуды жоспарлап отыр
2035 жылға қарай калий тыңайтқыштарын өндіру қуатын 12 млн тоннаға дейін арттыру жоспарлануда
Қазақстан алдағы жылдары минералды тыңайтқыштардың негізгі түрлеріне деген ішкі қажеттілікті толық қамтамасыз етіп, өнімді сыртқы нарықтарға жеткізуді бастай алады. Бұл туралы The World Financial Review басылымына сілтеме жасап, Қазинформ хабарлайды.
Материалда атап өтілгендей, қазіргі уақытта Қазақстанда жалпы құны бірнеше миллиард АҚШ долларын құрайтын жаңа буын кәсіпорындарын құру жобалары жүзеге асырылуда. Жаңа өндірістік қуаттарды іске қосу калий, азот және фосфор тыңайтқыштарын өндіру көлемін айтарлықтай арттыруға мүмкіндік береді.
Ірі жобалардың бірі Qazaq Kalium Ltd. компаниясының калий тыңайтқыштарын өндіру кәсіпорны болмақ. Қуаты 1 млн тонна болатын кәсіпорынның бірінші кезеңін 2027 жылы пайдалануға беру жоспарланған.
Одан әрі компания өндіріс көлемін кезең-кезеңімен арттыруды көздеп отыр. 2035 жылға қарай өндірістік қуат жылына 12 млн тонна калий тыңайтқышына жетуі тиіс.
Бұл ретте Қазақстанның осы тыңайтқыш түріне деген ішкі қажеттілігі шамамен 100 мың тоннаны құрайды. Жоспарланған өндіріс көлемін ескере отырып, Қазақстан әлемдік нарықта калий тыңайтқыштарының ірі экспорттаушысына айнала алады деп күтілуде.
Өндірістік базаны кеңейту карбамид сегментінде де қарастырылған. Бұл өнімге деген ішкі сұранысты 2029–2030 жылдары үш ірі кешен іске қосылғаннан кейін қамтамасыз ету жоспарланып отыр.
Атап айтқанда, KMG PetroChem жобасы 800 мың тонна карбамид өндіруді көздейді. Qazesta Fertilizers Ltd. кәсіпорнының қуаты 700 мың тоннаны құрауы тиіс.
Тағы бір жоба — KazAzot PRIME — 577 мың тонна карбамид және 500 мың тонна аммиак селитрасын өндіруге есептелген.
Сонымен қатар фосфор тыңайтқыштарын өндіру көлемін арттыру жоспарлануда. Kazphosphate SINOPEC және CNCEC компанияларымен бірлесіп тиісті өндірістік қуаттарды 5 млн тоннаға дейін ұлғайтуды көздеп отыр.
Осы жоспарлар аясында алғашқы 1 млн тонна аммофосты 2029 жылы өндіру жоспарланған.
Осылайша, жарияланған жобаларды іске асыру Қазақстанға 2030 жылға қарай минералды тыңайтқыштардың негізгі түрлеріне деген ішкі сұранысты толық қамтамасыз етуге және өнімді экспорттық нарықтарға жеткізуді бастауға мүмкіндік беруі тиіс.
