14.08.2026, 00:04
Қазақстандағы ірі қара мал саны 9,1 млн басқа жетті
Оң динамика мал шаруашылығында да, ет өнімдерін өндіруде де байқалуда
Қазақстанда ауыл шаруашылығы жануарларының негізгі түрлерінің саны өсуін жалғастыруда. Сонымен қатар, мал шаруашылығы өнімдерін өндіру көлемі де артып келеді.
Қазақстан Республикасы Ауыл шаруашылығы министрлігінің мәліметінше, 2026 жылғы 1 тамыздағы жағдай бойынша елдегі ірі қара мал саны 9,1 млн басқа жетті. Өткен жылдың сәйкес кезеңімен салыстырғанда бұл көрсеткіш 415,5 мың басқа артты.
Қой саны 21,9 млн басқа дейін өсіп, өткен жылғы деңгейден 772,4 мың басқа артты. Жылқы саны 4,9 млн басқа жетіп, 342,05 мың басқа көбейді.
Түйе саны 312,04 мың басты құрады, бұл өткен жылдың сәйкес кезеңімен салыстырғанда 11,7 мың басқа көп. Құс саны 205,8 мың басқа артып, 48,2 млн басқа жетті.
Оң динамика мал шаруашылығы өнімдерін өндіруде де байқалады. 2026 жылғы қаңтар–шілде айларында Қазақстанда сойыс салмағымен есептегенде барлық түрдегі 640,6 мың тонна ет өндірілді. Бұл өткен жылдың сәйкес кезеңімен салыстырғанда 31,8 мың тоннаға көп.
