20.08.2026, 00:26
СҚО шетелден 6 мыңнан астам асыл тұқымды мал әкелуді жоспарлап отыр
Мал басын іріктеу кезінде мамандар жануарлардың генетикалық әлеуетін, өнімділігін және денсаулық жағдайын бағалайды
Солтүстік Қазақстан облысы 2026–2030 жылдарға арналған Мал шаруашылығын дамытудың кешенді жоспары аясында шетелдік асыл тұқымды мал сатып алу жобаларын іс жүзінде жүзеге асыруға кірісті. Жұмыс өндірісті кеңейтуге, табынның генетикалық әлеуетін жаңартуға және саланың өнімділігін арттыруға бағытталған.
Малдарды іріктеу үшін Солтүстік Қазақстан облысының делегациясы Австралиядағы мал шаруашылығы қожалықтарына барды. Делегация құрамына облыс әкімінің бірінші орынбасары Марат Тасмағанбетов, Мал өсірушілер одағының басшысы Дәурен Салықов және ауыл шаруашылығы тауарын өндірушілердің өкілдері кірді.
Сапар барысында мамандар жануарларды қарап, алдын ала іріктеу жүргізді. Бағалау кезінде асыл тұқымдық және өнімділік сипаттамалары, тұқымы, жасы, тірілей салмағы, денсаулық жағдайы, экстерьері және болашақ табынның өнімділігі мен өсімін молайту қасиеттеріне әсер ететін басқа да көрсеткіштер ескерілді.
Мал басын іріктеумен қатар алдағы жеткізілімдердің ұйымдастырушылық және экономикалық мәселелері пысықталды. Атап айтқанда, тараптар жануарлардың құнын, ветеринариялық талаптарды, карантиннен өту шарттарын, логистиканы және болжамды жеткізу мерзімдерін қарастырды.
Кешенді бағалау ауыл шаруашылығы тауарын өндірушілерге мал басын таңдауда жануарлардың қолжетімділігін ғана емес, олардың сапасын, генетикалық әлеуетін және іске асырылатын жобалардың экономикалық тиімділігін де ескеруге мүмкіндік береді.
Шетелдік асыл тұқымды малдың алғашқы ірі партиялары Солтүстік Қазақстан облысына биылғы күзде жеткізіледі деп күтілуде. 2026 жылғы қыркүйек–қазан айларында өңірге 2 мыңнан астам ірі қара мал және 4 мыңнан астам ұсақ мал әкелу жоспарланып отыр.
Шетелдік асыл тұқымды малды іріктеу жұмыстары еліміздің басқа өңірлерінде де жүргізіледі. Атап айтқанда, қыркүйек айында Қостанай облысының делегациясы осындай мақсатпен Ирландияға баруды жоспарлап отыр.
Асыл тұқымды мал сатып алу 2026–2030 жылдарға арналған Мал шаруашылығын дамытудың кешенді жоспары аясында жүзеге асырылады. Құжат саланы кеңейтуге, инвестициялар тартуға және жаңа өндірістік жобаларды іске асыруға жағдай жасауды көздейді.
Саланы дамыту құралдарының бірі — жеңілдетілген қаржыландыру тетіктері. Олар ауыл шаруашылығы тауарын өндірушілерге шаруашылықтарды кеңейтуге, асыл тұқымды мал сатып алуға және заманауи өндірістік база құруға қаражат бағыттауға мүмкіндік береді.
