Продкорпорация форвардтық қаржыландыру алушылардың егістік жағдайын бағалады

Продкорпорацияның форвардтық қаржыландыру бағдарламасына қатысатын ауыл шаруашылығы кәсіпорындары егін жинауға кірісті. Шілде айының ортасынан бастап компания мамандары бағдарлама қатысушыларына көшпелі мониторинг жүргізіп, егістіктің жағдайын, бөлінген қаражаттың мақсатты пайдаланылуын және ықтимал тәуекелдерді бағалауда.

Биыл мониторинг аясында мамандар Солтүстік Қазақстан облысындағы 54 шаруашылықтың, Қостанай облысындағы 73 шаруашылықтың, Ақмола облысындағы 44, Павлодар облысындағы 6 және Шығыс Қазақстан облысындағы 3 агроқұрылымның егістіктерін тексерді.

Тексеру нәтижелері зерттелген алқаптардағы егістіктің жақсы жағдайда екенін көрсетеді. Сонымен қатар өңірлердегі жағдай ауа райына, ылғалмен қамтамасыз етілу деңгейіне және қоректік заттардың болуына байланысты ерекшеленеді. Астықты белдеудегі шаруашылықтардың басым бөлігінде егін жинау жұмыстары басталып кетті.

Қостанай облысында 17 тамыздағы жағдай бойынша дәнді және дәнді-бұршақты дақылдардың ең жоғары өнімділігі Федоров ауданында тіркелді — 28 ц/га. Қарабалық ауданында бұл көрсеткіш 22,8 ц/га, Денисов ауданында 18,6 ц/га болды.

Ақмола облысында егін жинау науқанының бастапқы кезеңінде жоғары көрсеткіштердің қатарында Бурабай және Бұланды аудандары бар. Мұнда өнімділік тиісінше 20,1 және 20 ц/га құрайды. Зеренді ауданының шаруашылықтарында орта есеппен 15,7 ц/га өнім алынуда.

Солтүстік Қазақстан облысының Айыртау және Есіл аудандарында дәнді және дәнді-бұршақты дақылдардың өнімділігі 16,5 ц/га-ға жетеді. Мағжан Жұмабаев ауданында көрсеткіш 15 ц/га, ал Қызылжар ауданында 14,9 ц/га құрайды.

Форвардтық қаржыландыру шаруашылықтарды көктемгі егіс науқанына дайындау құралдарының біріне айналды. Алынған қаражатты аграршылар тұқым, минералды тыңайтқыштар, өсімдіктерді қорғау құралдары мен жанар-жағармай сатып алуға, сондай-ақ дала жұмыстарын жүргізуге пайдаланды.

«Имран Agro» ЖШС директоры Омурсерик Акишев қаржылық қолдау ауыл шаруашылығы маусымының басында, шаруашылықтар негізгі шығындарды көтеріп жатқанымен, болашақ өнімді сатудан әлі табыс түспеген кезеңде ерекше қажет екенін атап өтті. Оның айтуынша, бөлінген қаражат ЖЖМ мен тыңайтқыштарды уақтылы сатып алуға және қажетті жұмыстарды оңтайлы мерзімде жүргізуге мүмкіндік берген.

Сонымен қатар аграршылар өсімдік шаруашылығын әртараптандыру аясында егіс алқаптарының құрылымын өзгертуді жалғастыруда. Мемлекет басшысы ауыл шаруашылығы тауарын өндірушілермен кездесулерде бидайға тәуелділікті азайту және жоғары рентабельді дақылдар өндірісін арттыру қажеттілігіне бірнеше рет назар аударған.

2026 жылы Қазақстандағы майлы дақылдар алқабы рекордтық 5,1 млн га-ға жетті. Оның 2,2 млн гектары күнбағыс егістігіне тиесілі.

Солтүстік Қазақстан облысындағы «Сматаев» шаруа қожалығының басшысы Саттар Сматаев шаруашылықтың майлы дақылдар алқабын біртіндеп ұлғайтып жатқанын хабарлады. Оның айтуынша, бұл өнімге сұраныс өндірісті әртараптандыруға және тек бидайға ғана сүйенбей, тәуекелдерді әртүрлі дақылдар арасында бөлуге мүмкіндік береді. Мұндай жоспарлау мүмкіндіктерін мемлекет пен Продкорпорацияның қолдауы да кеңейтеді.

Бағдарлама қатысушылары қаржыландыруға қол жеткізумен қатар, егін жиналғаннан кейін өндірілген ауыл шаруашылығы өнімінің бір бөлігін кепілді түрде өткізу мүмкіндігі маңызды фактор болып қала беретінін атап өтеді.

Қостанай облысындағы «Агро Егін» шаруа қожалығының басшысы өндірушілер үшін қаржы алып, егіс науқанын уақтылы өткізу ғана емес, болашақ өнімді өткізу мүмкіндіктерін алдын ала түсіну де маңызды екенін атап өтті. Оның бағалауынша, форвардтық сатып алу тетігі осы міндетті шешуге мүмкіндік береді.

Продкорпорация бағдарламаға қатысушы шаруашылықтардағы егін жинау науқанының барысын бақылауды және ауыл шаруашылығы тауарын өндірушілермен өзара іс-қимылды жалғастыруда.