21.08.2026, 00:26
Фермерлер Қостанай облысындағы АӨК-ті қолдаудың бірқатар тетіктерін қайта қарауды ұсынды
Негізгі мәселелер қатарында астықты қабылдау шарттары, жанармайдың қолжетімділігі және шаруашылықтарды тыңайтқыштармен қамтамасыз ету бар
Қостанай облысының ауыл шаруашылығы тауарын өндірушілер қауымдастығы өңірдің агроөнеркәсіптік кешенін одан әрі дамыту үшін шешуді қажет ететін бірқатар мәселені көтерді. Ұсыныстар облыстық Кәсіпкерлер палатасының АӨК және әлеуметтік сала мәселелері жөніндегі салааралық кеңесінде айтылды.
Негізгі тақырыптардың бірі егін жинау науқаны кезіндегі элеваторлардың жұмысы болды. Аграршылардың айтуынша, астық қабылдау кәсіпорындары астықтың сапалық көрсеткіштеріне әртүрлі талаптар қояды, соның салдарынан ауыл шаруашылығы тауарын өндірушілер өнімді тапсыру кезінде қиындықтарға тап болады.
Фермерлер жақын орналасқан элеваторларға тәуелділікті де қосымша мәселе ретінде атап отыр. Логистикалық шектеулерге байланысты шаруашылықтардың басқа астық қабылдау орындарын таңдау мүмкіндігі әрдайым бола бермейді, сондықтан олар жақын маңдағы кәсіпорындардың қызметін жоғары тарифтермен пайдалануға мәжбүр.
Мәселені шешудің бір жолы ретінде Ауыл шаруашылығы тауарын өндірушілер қауымдастығы астық инспекциясының жұмысын қалпына келтіруді ұсынып отыр. Бұған дейін бұл мәселе бейінді министрлік алдында көтерілген болатын.
Тағы бір тақырып шаруашылықтарды жеңілдетілген жанар-жағармай материалдарымен қамтамасыз ету болды. Қостанай облысына литрі 305 теңгеден аспайтын бағамен 79,1 мың тонна дизель отыны бөлінді. Қазіргі уақытта операторлар тамыз айына қарастырылған 26,6 мың тонна көлемді жөнелтуде.
Сонымен қатар ауыл шаруашылығы тауарын өндірушілер үшін жеңілдетілген қысқы дизель отынын бөлу мәселесі өзекті болып отыр. Ол күздің соңына дейін жалғасатын майлы дақылдарды жинау жұмыстарына қажет.
АӨК кеңесі мен Қауымдастық төрағасы Александр Бородин аграршыларға Павлодар мұнай өңдеу зауытынан қысқы дизель отынының кемінде 30%-ын алдын ала бөлуді ұсынды.
Сондай-ақ ауыл шаруашылығы тауарын өндірушілер минералды тыңайтқыштармен қамтамасыз ету және мемлекеттік қолдауды уақтылы алу мәселесіне назар аударды. Бұл мәселе әсіресе сүрі жерлерге тыңайтқыш енгізетін шаруашылықтар үшін өзекті.
Отандық кәсіпорындарда қажетті көлемдегі өнім жетіспеген жағдайда аграршылар импорттық тыңайтқыштарды сатып алуға мәжбүр. Бұл ретте импорттық тыңайтқыштарды субсидиялау төменірек мөлшерлеме бойынша жүзеге асырылады, бұл шаруашылықтардың қаржылық жүктемесін арттырады.
Бұл мәселені шешу үшін аграршылар облыстық ауыл шаруашылығы басқармасына сатып алу маусымы басталғанға дейін минералды тыңайтқыштардың қажетті көлемдерінің тізілімін қалыптастырып, тиісті ақпаратты отандық өндіруші зауыттарға алдын ала жіберуді ұсынып отыр. Мұндай тетік нарықтың қажеттіліктерін қамтамасыз етуге және ауыл шаруашылығы тауарын өндірушілердің шығындарын оңтайландыруға мүмкіндік береді деп болжануда.
Отырыста еңбек мигранттарын тарту мәселесі де жеке қаралды. Қостанай облысына маусымдық жұмысшыларды тартуға арналған квота 180-нен 405 рұқсатқа дейін ұлғайтылды. Сонымен бірге аграрлық сектор өкілдерінде оларды бөлудің қолданыстағы тетігіне қатысты сұрақтар бар.
Ауыл шаруашылығы тауарын өндірушілер АӨК кәсіпорындары үшін қайта бөлуге жатпайтын атаулы квоталар енгізуді ұсынып отыр. Бұдан бөлек, рұқсаттарды бөлу кезінде сәуірден қазанға дейінгі кезеңдегі ауыл шаруашылығы жұмыстарының маусымдық сипатын ескеру ұсынылды.
Қауымдастық ұсынған барлық ұсыныстар қазіргі уақытта облыстық ауыл шаруашылығы басқармасы мен бейінді министрліктердің қарауында.
