09.06.2026, 00:44
Қазақстанда жылына 18 мың тоннадан астам өнім өндіретін ет өңдеу кешені салынады
Жаңа өңдеу кешені жаңа жұмыс орындарын ашып, Қазақстанның ет өнімдерінің экспорттық әлеуетін арттырады
Астана қаласының Индустриялық парк аумағында «Астана ЕТКОМ» ЖШС-нің заманауи ет өңдеу кәсіпорнының құрылысы жалғасуда. Жоба Мемлекет басшысының ауыл шаруашылығы өнімдерін өңдеуді дамыту және жоғары қосылған құны бар өнімдер өндірісін ұлғайту жөніндегі тапсырмаларын іске асыру аясында Үкімет пен Астана қаласы әкімдігінің қолдауымен жүзеге асырылуда. Нысан құрылысының барысымен Қазақстан Республикасының Премьер-Министрі Олжас Бектенов танысты.
Жобаның жалпы инвестициялық құны 8 млрд теңгені құрайды. Қаржыландыру мемлекеттік кәсіпкерлікті қолдау бағдарламалары аясында тартылған несиелік қаражат пен инвесторлардың жеке қаражаты есебінен қамтамасыз етілуде. Кәсіпорынды пайдалануға беру 2026 жылдың екінші тоқсанына жоспарланған.
Зауыт іске қосылғаннан кейін тәулігіне 50 тоннаға дейін дайын өнім өндіріп, жылдық көлемі 18 мың тоннадан асады. Шикізат ретінде отандық өндірушілердің, оның ішінде «Айтас» АҚ, «KazBeef» ЖШС және еліміздің түрлі өңірлеріндегі фермерлік шаруашылықтардың өнімдері пайдаланылмақ. Кәсіпорында шұжық өнімдері, ет деликатестері, жартылай фабрикаттар және салқындатылған ет өнімдері шығарылады.
Жобаның алғашқы кезеңінде 100-ге дейін жұмыс орны ашылады. Кәсіпорын толық қуатына шыққаннан кейін қызметкерлер саны 300 адамға дейін ұлғаяды. Білікті кадрлар даярлау мақсатында колледждер мен басқа да оқу орындарының студенттерін оқыту ұйымдастырылып, кейін оларды жұмысқа орналастыру көзделген.
Жаңа ет комбинатының өнімі ішкі нарыққа да, экспорттық жеткізілімдерге де бағытталатын болады.
Жұмыс сапары барысында Олжас Бектенов сондай-ақ нан-тоқаш және сүт өнімдерін өндіретін «RnR Group» ЖШС-нің өндірістік алаңдарын аралады. Бұл жобалардың жалпы инвестициялық құны 8,8 млрд теңгені құрайды.
Премьер-Министрге аталған жобалардың өңдеу қуаттарын кеңейтуге, отандық азық-түлік өнімдерін өндіру көлемін арттыруға және елорданың азық-түлік қауіпсіздігін нығайтуға бағытталғаны туралы баяндалды. Кәсіпорындардың өндірістік қуаты тәулігіне 25 тоннаға дейін ұннан жасалған өнімдер мен 100 тоннаға дейін сүт өнімдерін шығаруға мүмкіндік береді.
Атап айтқанда, сүт өңдеу зауыты сүт, айран, қаймақ, йогурт және басқа да сүт өнімдерін өндіреді. Жоба тәулігіне 100 тоннаға дейін сүт өңдеуді және өндіріс көлемін одан әрі ұлғайтуды көздейді. Кәсіпорынның ассортименті шамамен 350 түрлі өнімнен тұрады. Жобаның құны 6 млрд теңге көлемінде бағаланады. Зауыт 2026 жылы пайдалануға берілген, ал алғашқы өнімді шығару осы жылдың тамыз айына жоспарланған.
Екі кәсіпорын да өздерінің шикізат базасымен қамтамасыз етілген. Дайын өнім сауда желілеріне, әлеуметтік нысандарға және елорданың басқа да ұйымдарына жеткізіледі.
Бұл жобаларды іске асыру Үкімет пен Астана қаласы әкімдігінің Мемлекет басшысының өңдеу қуаттарын ұлғайту, азық-түлік қауіпсіздігін қамтамасыз ету және ішкі нарықтағы отандық өнім үлесін арттыру жөніндегі тапсырмаларын орындауға бағытталған жүйелі жұмысының жалғасы болып табылады.
2025–2026 жылдары елордада азық-түлік қауіпсіздігін нығайту мақсатында жалпы сыйымдылығы 12 мың тонна болатын екі көкөніс қоймасы және жылына 53 мың тонна өнім өндіруге қабілетті үш өңдеу кәсіпорны пайдалануға берілді. Сонымен қатар, 18 мың тонна көкөніс өнімін жеткізу бойынша келісімшарттар жасалған.
Алдағы екі жылда Астананың агроөнеркәсіптік кешенінде жалпы құны 180 млрд теңгені құрайтын тағы жеті инвестициялық жобаны іске қосу жоспарланып отыр. Олардың жүзеге асырылуы шамамен 1,6 мың жаңа жұмыс орнын ашуға мүмкіндік береді.
Олжас Бектеновтің айтуынша, терең өңдеуді дамыту агроөнеркәсіптік кешенді дамытудың негізгі басымдықтарының бірі болып қала береді. Президент тапсырмасына сәйкес салаға қолдау көрсету шаралары күшейтіліп, инфрақұрылымды дамыту, ветеринариялық жүйені жаңғырту және бақылау тетіктерін жетілдіру жұмыстары жалғасуда. Қазақстанның аусылдан таза ел мәртебесін алуы мал шаруашылығын дамытуға және экспорт көлемін ұлғайтуға қосымша мүмкіндіктер ашады. Тұрақты шикізат базасы мен соңғы жылдардағы жоғары өнімділікпен қатар бұл факторлар өңдеу көлемін ұлғайтуға, дайын өнім шығаруды арттыруға және қазақстандық тауарларды ішкі және сыртқы нарықтарға ілгерілетуге жағдай жасайды.