26.07.2026, 23:35
Қазақстанда дайындалған мал азығының көлемі 15,9 млн тоннаға жетті
Қазақстан Республикасы Ауыл шаруашылығы министрлігі науқанның қарқыны мен өңірлердегі жоспарлы көрсеткіштердің орындалуын бақылауда ұстап отыр
Еліміздің өңірлерінде мал азығын дайындау науқаны жалғасуда. Облыс әкімдіктерінің жедел мәліметтері бойынша, бүгінгі таңда ауыл шаруашылығы тауарын өндірушілер 15,9 млн тонна мал азығын дайындады. Оның ішінде 13,7 млн тонна пішен, 1,2 млн тонна пішендеме және 46,4 мың тонна сүрлем бар.
Мал азығы қорын қалыптастыру Ауыл шаруашылығы министрлігі мен облыс әкімдіктері бірлесіп бекіткен 2026–2027 жылдардағы малды қыстатуға дайындық жоспары аясында жүргізілуде. Құжатқа сәйкес 25,7 млн тонна пішен, 2,3 млн тонна пішендеме, 2,8 млн тонна сүрлем, 4,8 млн тонна сабан және 5,7 млн тонна құнарландырылған жем дайындалуы тиіс.
Мал азығы қорын нығайтудың негізгі бағыттарының бірі – мал азықтық дақылдардың егіс алқаптарын кеңейту. Биыл олардың көлемі 3,32 млн гектардан асып, өткен жылмен салыстырғанда 243 мың гектарға ұлғайды. Сонымен қатар егістік жерлердегі мал азықтық дақылдардың үлесі 14%-ға дейін артты, бұл мал шаруашылығын қажетті жемшөп көлемімен қамтамасыз етуге қосымша мүмкіндік береді.
Қазақстан Республикасы Ауыл шаруашылығы министрлігі мал азығын дайындау науқанының барысын тұрақты бақылауда ұстап отыр. Жедел штабтың отырыстарында жұмыстардың қарқыны, өңірлер арасындағы үйлестіру, ауыл шаруашылығы өндірушілерінің қажетті ресурстармен қамтамасыз етілуі және бекітілген жоспарлы көрсеткіштердің орындалуы қаралады.
Жоспарланған іс-шараларды іске асыру алдағы қысқы қорада ұстау кезеңінде мал шаруашылығының қажеттілігін қамтамасыз етіп, қажетті жемшөп қорын қалыптастыруға мүмкіндік береді.
