26.07.2026, 23:59
Абай облысында «Бақты» мультимодальды құрғақ портының құрылысы басталды
Жобаның алғашқы кезеңінде 200 жаңа жұмыс орны ашылады, ал кешен құрамына терминалдар, қоймалар және кедендік инфрақұрылым кіреді
Абай облысының Мақаншы ауданындағы Бақты ауылында болашақ «Бақты» мультимодальды құрғақ порты мен логистикалық парктің іргетасын қалау рәсімі өтті.
Жоба аясында ірі көлік-логистикалық кешен салынады. Оның құрамына контейнерлік және астық терминалдары, қойма кешендері, кедендік және логистикалық инфрақұрылым, автомобиль терминалы, сондай-ақ сервистік қызмет көрсету нысандары кіреді. Сонымен қатар жалпы ауданы 50 мың шаршы метрге дейін болатын бондтық қоймалардың құрылысы жоспарланған.
Жаңа терминалдың жобалық қуаты жылына 1 млн контейнерді құрайды. Жоспар бойынша 2032 жылға қарай жыл сайынғы өңдеу көлемі 700 мың контейнерге жетуі тиіс.
Жобаны іске асырудың алғашқы кезеңінде 210 млн АҚШ доллары көлемінде инвестиция тарту көзделген. Қаржыландыру жеке инвестициялар есебінен жүзеге асырылады. Сонымен қатар 200 жаңа жұмыс орнын ашу жоспарланған.
«Бақты» құрғақ порты Достық пен Қорғастан кейін Қазақстан мен Қытай арасындағы үшінші теміржол шекаралық өткелі болады. Жаңа логистикалық торап Қазақстан–Қытай шекарасының өткізу қабілетін жылына қосымша 20–25 млн тонна жүкке арттыруға және қолданыстағы өткелдерге түсетін жүктемені азайтуға мүмкіндік береді.
