27.07.2026, 00:34
Трамп Қазақстан мен тағы 59 елге қатысты жаңа сауда баждары туралы жарлыққа қол қойды
Жаңа сауда шаралары 60 мемлекетке қатысты енгізіліп, 2026 жылғы 24 шілдеден бастап күшіне енеді
АҚШ президенті Дональд Трамп Қазақстан мен Ресейді қоса алғанда, 60 мемлекетке қатысты сауда режимін қатаңдатуды көздейтін жарлыққа қол қойды. 2026 жылғы 24 шілдеден бастап бұл елдерден АҚШ-қа жеткізілетін тауарларға 10% және 12,5% мөлшерінде баж салығы енгізіледі. Бұл туралы Ақ үйге сілтеме жасап, «Курсив» хабарлады.
Жаңа шаралар АҚШ Сауда өкілдігі басқармасының (USTR) жүргізген тергеуінің нәтижесінде енгізілуде. АҚШ әкімшілігінің мәліметінше, тізімге енгізілген мемлекеттер мәжбүрлі еңбекпен өндірілген өнімдердің импортына тыйым салудың сақталуын жеткілікті деңгейде қамтамасыз ете алмай отыр.
Тізімге Ұлыбритания, Швейцария, Түркия, Қытай, Біріккен Араб Әмірліктері, сондай-ақ Латын Америкасы мен Азияның бірқатар мемлекеттері енген. Посткеңестік елдердің ішінде Қазақстан мен Ресей аталған.
Қазақстан мен Ресейден импортталатын тауарларға 12,5% мөлшерінде баж салығы белгіленеді. Сонымен қатар жарлықта бірқатар ерекшеліктер қарастырылған. Баж салығы импортқа шектеу қою тапшылыққа әкелуі мүмкін шикізатқа, экономикаға елеулі кері әсер етуі ықтимал өнімдерге, сондай-ақ АҚШ-та жеткілікті көлемде өндірілмейтін немесе өсірілмейтін жекелеген тауарларға қолданылмайды.
Осылайша, Қазақстанның АҚШ-қа экспорттайтын негізгі өнімдерінің едәуір бөлігі жаңа тарифтердің қолданылу аясынан тыс қалуы мүмкін.
Аргентина, Бангладеш, Мексика, Ұлыбритания, Үндістан, Индонезия, Иордания, Малайзия және тағы басқа бірқатар мемлекеттер үшін баж мөлшерлемесі 10% деңгейінде белгіленген.
Жаңа тарифтер 2026 жылғы 24 шілдеде Шығыс уақыты бойынша сағат 00:01-де күшіне енеді. Олар Дональд Трамп әкімшілігі 2026 жылғы ақпанда АҚШ Жоғарғы соты 2025 жылғы сәуірде енгізілген сауда баждарының күшін жойғаннан кейін енгізген уақытша 10%-дық жаһандық баж салығын алмастырады.
2026 жылғы ақпанда АҚШ президенті барлық елдер үшін жаһандық тарифті 15%-ға дейін көтеретінін де жариялаған болатын. Ал оған бір күн қалғанда, яғни 20 ақпанда, АҚШ Жоғарғы сотының шешімінен кейін тариф мөлшерлемесі 10% деңгейінде белгіленген еді.
