11.06.2026, 23:35
Қазақстан ҚХР-дан әкелінген 39,5 тонна залалданған өнімнің елге кіруіне жол бермеді
Қауіпті карантиндік зиянкестер ҚХР-дан «Нұр Жолы» өткізу пункті арқылы жеткізілген шабдалы мен сәбіз партияларынан анықталды
«Нұр Жолы» фитосанитариялық бақылау бекетінде Агроөнеркәсіптік кешендегі мемлекеттік инспекция комитетінің мамандары Қытай Халық Республикасынан әкелінген залалданған карантиндік өнімнің Қазақстан аумағына енгізілуіне жол бермеді.
Мұқият тексеру және зертханалық сараптама жүргізу барысында жалпы салмағы 39,52 тоннаны құрайтын екі өнім партиясынан қауіпті карантиндік нысандар анықталды.
Атап айтқанда, салмағы 19 тонна болатын шабдалы партиясынан карантиндік зиянкес саналатын шығыс жеміс жемірі табылды. Ал салмағы 20 тонна сәбіз партиясынан алтын түсті картоп нематодасы анықталды.
Өсімдіктер карантині саласындағы ұлттық заңнама мен халықаралық талаптарға сәйкес, залалданған өнімнің барлығы экспорттаушы елге — Қытай Халық Республикасына қайтарылды. Жүк иелеріне қатысты әкімшілік іс жүргізу басталды.
Мамандардың айтуынша, мұндай карантиндік нысандардың ел аумағына енуі азық-түлік қауіпсіздігіне қауіп төндіріп, отандық ауыл шаруашылығы тауарын өндірушілердің өнім шығынына әкелуі мүмкін.
Осындай тәуекелдердің алдын алу мақсатында мемлекеттік шекарада және фитосанитариялық бақылау бекеттерінде бақылау күшейтілген режимде жалғасуда. Қабылданып жатқан шаралар Қазақстанның фитосанитариялық, экологиялық және азық-түлік қауіпсіздігін қамтамасыз етуге бағытталған.