Ақмола облысының агроөнеркәсіптік секторын дамытуға 235 млрд теңгеден астам қаржы бағытталды

2026 жылы форвардтық сатып алу тетігі аясында «Азық-түлік келісімшарт корпорациясы» ҰК» АҚ Ақмола облысының 38 ауыл шаруашылығы тауарын өндірушісімен жалпы сомасы 4,2 млрд теңгеге келісімшарттар жасасты. Облыс әкімдігінің мәліметінше, өткен аптаның соңындағы жағдай бойынша 55 өтінім бойынша 3,3 млрд теңге көлемінде қаржыландыру жүргізілген. Бұл шамамен 59 мың тонна ауыл шаруашылығы өнімін жеткізуді қамтамасыз етуге мүмкіндік береді.

Жалпы алғанда, Ақмола облысының аграрлық секторын қолдауға жеңілдетілген несиелер мен субсидиялар түрінде 235 млрд теңгеден астам қаражат бағытталған. «Кең Дала – 2» көктемгі егіс және егін жинау жұмыстарын жеңілдетілген қаржыландыру бағдарламасы аясында 840 ауыл шаруашылығы тауарын өндіруші қаржылық қолдау алды. Бөлінген қаражаттың жалпы көлемі 122 млрд теңгені құрады.

Ақмола облысы еліміздің солтүстік өңірлері арасында ағымдағы жылғы егіс науқанын бірінші болып аяқтады. Облыстық ауыл шаруашылығы және жер қатынастары басқармасының мәліметі бойынша, жалпы егіс алқабы 77 мың гектарға ұлғайып, 5,6 млн гектарға жетті.

Ауыл шаруашылығы өндірісін әртараптандыру негізгі басымдықтардың бірі болып қала береді. Соңғы үш жылда өңірдегі майлы дақылдар алқабы алты есеге ұлғайып, 715 мың гектардан асты. Мал азықтық дақылдар 166,5 мың гектар жерге орналастырылды.

Топырақ құнарлылығын арттыру мақсатында ауыл шаруашылығы өндірушілері 330 мың тонна минералдық тыңайтқыш енгізді.

Саладағы техникалық жаңғырту жұмыстары да жалғасуда. Жыл басынан бері облыс аграршылары 789 бірлік ауыл шаруашылығы техникасын сатып алды. «ҚазАгроҚаржы» АҚ арқылы отандық ауыл шаруашылығы техникасын жеңілдетілген лизингке алу бағдарламасы аясында 610 техника бірлігін сатып алу жөнінде келісімшарттар жасалған.