19.05.2026, 23:46
Ауыл шаруашылығы өндірушілерін форвардтық қаржыландыру көлемі 11,6 млрд теңгеге өсті
Аграрлар қолдау бағдарламасы аясында күнбағыс, рапс және зығыр жеткізілімдерін арттыруда
«Азық-түлік келісімшарт корпорациясы» ҰК» АҚ аграршыларды форвардтық қаржыландыру көлемін 29,5 млрд теңгеге дейін ұлғайтты. 2025 жылмен салыстырғанда қолдау көлемі 11,6 млрд теңгеге артқан. Ұлттық астық операторы көктемгі егіс жұмыстарына қаржыландыруға өтінім қабылдауды өткен жылдың желтоқсан айында бастап, ауыл шаруашылығы өндірушілеріне егіс науқанына алдын ала дайындалуға мүмкіндік берген.
2026 жылғы 15 мамырдағы жағдай бойынша Продкорпорация күзгі жеткізілімге 478 мың тонна астық және майлы дақылдарды жеткізу бойынша келісімшарттар жасасты. Жеткізілім құрылымындағы негізгі үлес дәстүрлі түрде бидайға тиесілі — 334,3 мың тонна.
Сонымен қатар аграрлық кәсіпорындар Продкорпорация қорына 95 мың тонна майлы дақылдарды, соның ішінде күнбағыс, рапс және зығыр тұқымдарын жеткізуді жоспарлап отыр. Бұл көрсеткіш өткен аграрлық маусымдағы жеткізілім көлемінен 2,5 есе жоғары.
«Азық-түлік келісімшарт корпорациясы» ҰК» АҚ басқарма төрағасы Асылхан Джувашев фермерлердің майлы дақылдарды өсіруге қызығушылығы бірнеше факторға байланысты артып отырғанын атап өтті. Оның айтуынша, майлы дақылдардың нарықтық құны бидаймен салыстырғанда жоғары және олар ішкі қайта өңдеу кәсіпорындары мен сыртқы нарықтарда сұранысқа ие. Сонымен қатар ел ішінде жаңа қайта өңдеу қуаттарының іске қосылуы да сұранысты күшейтіп отыр.
Ол сондай-ақ майлы дақылдар өндірісінің дамуына егіс алқаптарын әртараптандыруға және монодақылдарға тәуелділікті азайтуға бағытталған мемлекеттік қолдау шаралары ықпал етіп отырғанын айтты. Атап айтқанда, Продкорпорация майлы дақыл өндірушілерге арналған форвардтық қаржыландыру лимиттерін ұлғайтты. Нәтижесінде жаңа аграрлық маусымда күнбағыс пен басқа да майлы дақылдарды жеткізуге өтінімдер екі есеге өсті.
Асылхан Джувашевтің айтуынша, қазіргі уақытта ауыл шаруашылығы өндірушілері бидай өсіруден нарықта сұранысқа ие дақылдарға біртіндеп қайта бағдарлануда. Бұл мемлекеттік аграрлық саясаттың басымдықтарына сәйкес келеді.
Форвардтық қаржыландыру шағын және орта ауыл шаруашылығы кәсіпорындарын қолдаудың ең сұранысқа ие құралдарының бірі болып қала береді. Бұл механизм аграршыларға егіс жұмыстарын жүргізуге, техниканы жөндеуге және қажетті ресурстарды сатып алуға айналым қаражатын уақытылы тартуға, сондай-ақ болашақ өнімді өткізуге кепілдік алуға мүмкіндік береді.
