15.05.2026, 01:22
Қазақстан мен Түркия ауыл шаруашылығы өнімдерінің саудасы бойынша ынтымақтастықты кеңейтуді көздеп отыр
Екі ел арасындағы АӨК өнімдерінің өзара саудасы 25%-дан астам өсті
Қазақстан Президенті Қасым-Жомарт Тоқаев түрік тарапына 2026–2028 жылдарға арналған ауыл шаруашылығы өнімдерінің өзара саудасын жандандыру жөніндегі Жол картасын қабылдауды ұсынды. Бұл бастама Түркия Президенті Режеп Тайып Ердоғанның қатысуымен өткен Жоғары деңгейдегі стратегиялық ынтымақтастық кеңесінің алтыншы отырысында жарияланды.
Келіссөздердің негізгі тақырыптарының бірі агроөнеркәсіптік кешендегі ынтымақтастықты дамыту болды. Ақорда мәліметінше, 2025 жылдың қорытындысы бойынша екі ел арасындағы АӨК өнімдерінің өзара сауда көлемі 25%-дан астам өсіп, шамамен 360 млн долларға жеткен.
Тараптар сондай-ақ бірлескен инвестициялық жобаларды жүзеге асыру мәселелерін талқылады. Атап айтқанда, Tiryaki Agro компаниясы глютен өндіру жобасын іске асыруда, ал Alarko Holding жылыжай кешенінің құрылысын жүргізіп жатыр.
Қасым-Жомарт Тоқаев қазіргі геосаяси жағдайда көлік-логистика саласының стратегиялық маңызы артып отырғанын атап өтті. Оның айтуынша, Транскаспий халықаралық көлік бағытына шетел мемлекеттерінің қызығушылығы артып келеді.
Қазақстан Президенті түрік бизнесін Құрық және Ақтау порттары арқылы жүк тасымалын ұлғайтуға бағытталған жобаларға белсенді қатысуға шақырды.
Сонымен қатар, Мемлекет басшысы Қазақстанда инвестициялық ахуалды жақсарту бойынша жүргізіліп жатқан жұмыстар туралы айтып, түрік инвесторларын шикізаттық емес секторлардағы жобаларды іске асыруға шақырды.
