18.05.2026, 01:32
Ауыл шаруашылығы өнімдері Қазақстанның Түркі мемлекеттері ұйымы елдеріне экспортының өсу драйверіне айналды
Тауар айналымының өсуіне қосылған құны жоғары өнім жеткізілімдері, кооперацияны дамыту және ұйым елдері арасындағы экспорттық тізбектердің кеңеюі ықпал етті
Түркі мемлекеттері ұйымына мүше елдер Қазақстан үшін ең перспективалы және қарқынды дамып келе жатқан экспорттық бағыттардың бірі ретінде өз позицияларын нығайтуды жалғастыруда. Бұл туралы «QazTrade» сауда саясатын дамыту орталығы» АҚ бас директоры Айтмұхаммед Алдажаров Астанада өткен «ТМҰ елдерінің экономикалық интеграциясы мен кооперациясы: өнеркәсіп, АӨК, логистика және цифрландыру салаларындағы жаңа мүмкіндіктер» бизнес-форумында мәлімдеді.
QazTrade мәліметінше, 2025 жылдың қорытындысы бойынша Қазақстан мен ТМҰ елдері арасындағы тауар айналымы 12,9 млрд АҚШ долларына жетіп, алдыңғы жылмен салыстырғанда 13,2%-ға өсті. Осы кезеңде Қазақстан экспорты 19,9%-ға артып, 9,49 млрд АҚШ долларын құрады.
Өсімнің негізгі үлесін қосылған құны жоғары өнімдердің жеткізілімдері қамтамасыз етті. Негізгі экспорттық тауарлар қатарында бидай, күнбағыс майы, металл өнімдері, кондитерлік өнімдер, дайын азық-түлік және минералды су аталды.
«Біздің мақсатымыз тек экспорт көлемін ұлғайту ғана емес, сонымен қатар Қазақстан тұрақты сапалы өнім ұсынатын сенімді серіктес ретінде танылатын тұрақты экспорттық тізбектерді қалыптастыру», — деді Айтмұхаммед Алдажаров.
Форум барысында ТМҰ елдерінің бірыңғай кооперациялық платформасын құру перспективалары да талқыланды. Бұл алаң өндірушілер, фермерлер, қайта өңдеу кәсіпорындары, логистикалық операторлар, сауда желілері мен инвесторлар арасындағы өзара іс-қимылдың практикалық құралына айналуы мүмкін.
QazTrade ұйымында ТМҰ елдері арасындағы ынтымақтастықты дамыту тек сауда көлемін арттыруға ғана емес, сонымен қатар бірлескен инфрақұрылым құруға, бірыңғай цифрлық шешімдерді енгізуге, логистикалық тәсілдерді үйлестіруге және тұрақты өндірістік байланыстарды нығайтуға негізделуі тиіс екенін атап өтті.
