20.05.2026, 23:43
«Қазақстанда жасалған» бағдарламасы бойынша өтінім қабылдау 25 мамырда басталады
Бағдарлама отандық өндірістегі техниканы 10 жылға дейін қаржыландыруды қарастырады
«ҚазАгроҚаржы» АҚ «Қазақстанда жасалған» жеңілдетілген лизинг бағдарламасы бойынша өтінім қабылдаудың қайта басталғанын хабарлады. Бағдарламаға қатысуға өтінімдерді 2026 жылғы 25 мамыр күні сағат 10:00-ден бастап беруге болады.
Бағдарлама отандық өндірістегі немесе құрастырылған ауыл шаруашылығы техникасы мен көлік құралдарын сатып алуға жеңілдетілген қаржыландыруды қарастырады. Бастаманың негізгі мақсаты — аграршыларды қолжетімді шарттармен заманауи техникамен қамтамасыз ету, сондай-ақ қазақстандық машина жасау саласының дамуын қолдау және ауыл шаруашылығы техникасы паркін жаңарту.
Бағдарлама аясында ауыл шаруашылығы тауарын өндірушілер қазақстандық өндірістегі өздігінен жүретін техниканы 10 жылға дейінгі мерзімге қаржылық лизингке рәсімдей алады. Қаржыландыру мөлшерлемесі жылдық 6%-ды құрайды, ал бастапқы жарна лизинг нысаны құнының 15%-ынан басталады.
«ҚазАгроҚаржы» компаниясында бағдарламаны іске асыру аграршылардың жеңілдетілген қаржыландыруға қолжетімділігін кеңейтуге және Қазақстанның агроөнеркәсіптік кешенін одан әрі дамытуға қосымша жағдай жасауға бағытталғанын атап өтті.
