02.06.2026, 01:10
Қазгидромет маусым айындағы ауа райы жағдайлары туралы мәлімдеді
Ыстық ауа райы кезең-кезеңімен жауын-шашын мен найзағай болатын салқындау күндермен алмасады
«Қазгидромет» РМК консультативтік болжамына сәйкес, маусым айында Қазақстанның басым бөлігінде ауаның орташа температурасы климаттық нормадан 1–2 градусқа жоғары болады деп күтілуде. Батыс өңірлерде температуралық фон көпжылдық көрсеткіштерге жақын болады.
Елдің көп бөлігінде жауын-шашын мөлшері норма шегінде болжануда. Алайда республиканың батысы мен солтүстік-батысының жекелеген аудандарында жауын-шашын көлемі орташа көпжылдық көрсеткіштерден жоғары болуы мүмкін.
Маусымның алғашқы онкүндігінде Қазақстанның басым бөлігінде ауа райы циклондар мен олармен байланысты атмосфералық фронттардың ықпалында болады. Осыған байланысты қысқа мерзімді жаңбыр, найзағай, бұршақ және екпінді желмен сипатталатын құбылмалы ауа райы күтіледі. Солтүстік-батыста кей жерлерде жауын-шашын мол болуы мүмкін.
Елдің оңтүстігі мен оңтүстік-батысында жекелеген күндері шаңды дауылдар болжанады.
Синоптиктердің мәліметінше, айдың басында ауа температурасы біртіндеп көтеріледі. Батыста, оңтүстік-батыста және Ақтөбе облысында түнгі температура плюс 6–12 градустан плюс 13–22 градусқа дейін, күндізгі температура плюс 15–25 градустан плюс 27–32 градусқа дейін жоғарылайды. Оңтүстік-батыста кей жерлерде ауа температурасы плюс 35 градусқа дейін жетеді.
Елдің солтүстігінде және Қостанай облысында ауа температурасы түнде плюс 11–16 градустан плюс 15–20 градусқа дейін, күндіз плюс 21–26 градустан плюс 28–33 градусқа дейін өзгереді. Оңтүстік өңірлерде түнгі температура плюс 17–25 градустан плюс 13–18 градусқа дейін, ал күндізгі температура күшті ыстық плюс 33–40 градустан плюс 23–31 градусқа дейін төмендейді. Оңтүстік-шығыста аптап ыстықтың біртіндеп әлсіреуі күтіледі — плюс 33–38 градустан плюс 20–27 градусқа дейін.
Алғашқы онкүндіктің басында шығыс және орталық өңірлерде күндізгі температура плюс 33–39 градусқа дейін жетуі мүмкін. Кейін бұл аймақтарда негізгі температуралық фон түнде плюс 13–20, күндіз плюс 25–33 градус болады.
Маусымның екінші және үшінші онкүндіктерінде ыстық кезеңдер салқындау және жаңбырлы күндермен алмасып отырады. Найзағай, желдің күшеюі күтіледі, ал кейбір аудандарда бұршақ пен шаңды дауылдар болуы мүмкін.
Бұл кезеңде температуралық режим тұрақсыз болып қалады. Батыста, солтүстікте, орталықта және шығыста түнгі температура плюс 8–18 бен плюс 15–25 градус аралығында, күндіз плюс 28–33-тен күшті ыстық плюс 35–39 градусқа дейін өзгереді. Елдің орталығында кей күндері ауа температурасы өте күшті ыстыққа — плюс 42 градусқа дейін жетуі мүмкін.
Қазақстанның оңтүстік бөлігінде түнгі температура плюс 14–23-тен плюс 20–28 градусқа дейін, ал күндізгі температура плюс 28–33-тен плюс 34–40 градусқа дейін ауытқиды. Кейбір күндері ауа температурасы өте күшті ыстыққа жетіп, плюс 40–46 градус болуы мүмкін.
