09.02.2026, 10:17
Khorgos Gateway құрғақ портының транзиттік мүмкіндіктерін кеңейтуде
Құрғақ портты жаңғырту жүк өңдеу үдерісін жеделдетіп, Қытай — Еуропа — Орталық Азия бағыттарын нығайтты
Арнайы экономикалық аймақ аумағында орналасқан Khorgos Gateway құрғақ порты транзиттік жүк өңдеу көлемін арттыруды жалғастыруда. 2025 жылы логистикалық хаб арқылы 372 мыңнан астам ДФЭ өтті, бұл өткен жылмен салыстырғанда 2%-ға жоғары. Бұл туралы «ҚТЖ» хабарлады.
Компания мәліметінше, Khorgos Gateway Қытай — Еуропа және Қытай — Орталық Азия бағыттарындағы негізгі қайта тиеу орталықтарының бірі ретінде өз позициясын нығайтты.
2025 жылы құрғақ порт аумағында кең табанды теміржолдың қосымша 10 желісі пайдалануға берілді. Сонымен қатар инфрақұрылымды цифрлық жаңғырту бойынша кешенді жұмыстар жүргізіліп, контейнерлерді өңдеу уақыты айтарлықтай қысқарды — қайта тиеу уақыты бес сағаттан бір сағатқа дейін азайды.
Khorgos Gateway — Ляньюньгандағы логистикалық базадан кейінгі Қазақстан мен Қытайдың логистика саласындағы екінші бірлескен жобасы. Кешен құрамына қайта тиеу теміржол станциясы, бидайды қоса алғанда астық өңдеу терминалы және контейнер алаңы кіреді.
ҚТЖ мәліметінше, арнайы экономикалық аймақта тиімді орналасуының арқасында жобаға түрлі салалардағы компаниялар қосылды. Бұл өңдеуші өнеркәсіптің дамуына және өңірдің логистикалық әлеуетінің нығаюына ықпал етуде.