20.03.2026, 11:05
Бруцеллёзбен күрес шараларын Қазақстан мен ФАО талқылады
Тараптар жоба аясындағы келесі қадамдарды келісіп, ветеринарлық бақылау саласындағы үйлестіруді күшейтуде
Біріккен Ұлттар Ұйымының Азық-түлік және ауыл шаруашылығы ұйымы (ФАО) Қазақстанға бруцеллёзбен күрес бағытында техникалық көмек көрсетуді жалғастыруда. Осы аптада жұмыс кездесулері өтіп жатыр, оның барысында тараптар 2027 жылдың наурызына дейін жоспарланған жобаны іске асырудың келесі кезеңдерін келісуде. Бұл туралы ҚР Ауыл шаруашылығы министрлігінің баспасөз қызметі хабарлады.
Талқылау барысында қатысушылар ауруды бақылау және алдын алу бойынша жүргізілген жұмыстың аралық қорытындыларын шығарды. Ұлттық құрылымдар мен халықаралық сарапшылар арасындағы өзара іс-қимылды күшейтуге, сондай-ақ жобаның соңғы кезеңіне арналған міндеттерді, мерзімдерді және жауапкершілікті нақтылауға ерекше назар аударылды.
Қазақстан Республикасы Ауыл шаруашылығы вице-министрі Аманғали Бердалиннің айтуынша, бруцеллёзбен күрес мал шаруашылығын дамыту және елдің азық-түлік қауіпсіздігін қамтамасыз ету тұрғысынан басым бағыттардың бірі болып қала береді. Оның сөзінше, халықаралық ұйымдармен ынтымақтастық жүйелі шешімдерді енгізуге және елдің ветеринарлық қызметінің әлеуетін нығайтуға мүмкіндік береді.
Сондай-ақ кездесу барысында жануарлар ауруларының ықтимал өршуіне дайындықты арттыру, техникалық білім алмасуды кеңейту және зооноздық инфекцияларды бақылау жүйесін жетілдіру үшін халықаралық озық тәжірибелерді енгізу мәселелері қарастырылды.
ФАО-ның жануарлар денсаулығы жөніндегі маманы Даниэль Бельтран-Алькрудо күш-жігерді үйлестіру мен сараптамалық тәжірибе алмасу бруцеллёз сияқты ауруларды тиімді бақылауда шешуші рөл атқаратынын атап өтті. Оның пікірінше, мұндай бастамалар тұрақты шешімдерді қалыптастыруға және ұлттық әрі өңірлік деңгейде ынтымақтастықты нығайтуға ықпал етеді.
Келіссөздер қорытындысы бойынша тараптар жобаны іске асырудың нақты келесі қадамдарын бекітуді жоспарлап отыр. Бұл бруцеллёздің алдын алу және бақылау шараларын күшейтуге, сондай-ақ жануарлар денсаулығын жақсартуға және азық-түлік қауіпсіздігін арттыруға мүмкіндік береді деп күтілуде.
