20.03.2026, 13:00
Қазақстанда қымыз өндірісі артты
Қымыз өндірісінің өсуі шұбат өндірісінің төмендеуі аясында байқалды
Ұлттық статистика бюросы Наурыз мерекесі қарсаңында ұлттық сусындар өндірісі бойынша деректерді жариялады. Жарияланған мәліметтерге сәйкес, ағымдағы жылдың алғашқы екі айының қорытындысы бойынша елде қымыз өндірісі 11,8%-ға артқан.
Қаңтар–ақпан айларында Қазақстанда 215 тонна қымыз өндірілді, бұл 2025 жылдың сәйкес кезеңімен салыстырғанда 23 тоннаға артық.
Сонымен қатар шұбат өндірісінің төмендеуі тіркелді. 2026 жылдың алғашқы екі айында түйе сүтінен дайындалатын сусын көлемі 206 тоннаны құрады, бұл өткен жылдың осы кезеңімен салыстырғанда 58 тоннаға аз. Төмендеу деңгейі 22,2% деп бағаланды.
2025 жылдың қорытындысы бойынша қымыз өндірісі 1126 тоннаны құрап, бір жыл ішінде 4,3%-ға төмендеді. Ал шұбат өндірісі осы кезеңде 1425 тоннаға жетіп, 27,6%-ға өсті.
