12.03.2026, 04:56
Қазақстанда биыл шегірткеге қарсы химиялық өңдеу көлемі азаяды
Ауыл шаруашылығы министрлігінде техниканы дайындау, зиянкестерді мониторингтеу және қорғау шараларын ұйымдастыру мәселелері талқыланды
2026 жылы Қазақстанда үйірлі шегірткелерге қарсы жүргізілетін химиялық өңдеу жұмыстарының болжамды көлемі 2,2 млн гектарды құрайды. Бұл көрсеткіш өткен жылмен салыстырғанда 0,5 млн гектарға аз. Бұл мәліметтер Ауыл шаруашылығы министрлігінде өткен фитосанитарлық қауіпсіздікті қамтамасыз ету мәселелері жөніндегі кеңесте жарияланды.
Ауыл шаруашылығы вице-министрі Ермек Кенжеханұлы фитосанитарлық қауіпсіздік аграрлық сектордың тұрақты дамуына және елдің азық-түлік қауіпсіздігін қамтамасыз етуге тікелей әсер ететін стратегиялық бағыттардың бірі екенін атап өтті.
Кеңес барысында шегіртке зиянкестеріне қарсы қорғаныс шараларын өткізуге дайындық мәселелері қаралды. Атап айтқанда, жоспарланған химиялық өңдеу көлемдері, арнайы техниканың дайындығы, жұмыртқа қапшықтарын анықтау және қазып алу жұмыстарының мерзімдері, сондай-ақ зиянкестердің таралуын жүйелі түрде мониторингтеу мәселелері талқыланды.
Жұмыстарды жүргізу үшін 532 бірлік бүрку техникасын пайдалану және шамамен 3,5 мың тексерушіні тарту жоспарланып отыр. Сонымен қатар республикалық және өңірлік деңгейде жедел штабтар, call-орталық және Telegram-бот жұмыс істейтін болады. Олар қорғаныс шаралары кезінде жедел үйлестіру мен әрекет етуді қамтамасыз етеді.
