Қазақстанда суару бойынша субсидиялар жүйесі жаңартылады

Қазақстан Республикасының Су ресурстары және ирригация министрлігі суару суына субсидия беру қағидаларына өзгерістер әзірлеуде. Бұл туралы вице-министр Талғат Момышев ОКҚ брифингінде мәлімдеді.

Ұсынылып отырған өзгерістерге лазерлік тегістегішті субсидияланатын су үнемдеу технологияларының тізіміне енгізу, жерасты суларын көтеруге жұмсалатын электр энергиясы шығындарын өтеу, сондай-ақ ылғал жинақтау суаруын және тұзданған топырақты шаю жұмыстарын субсидиялау кіреді.

Ведомство өкілінің айтуынша, қазіргі уақытта фермерлерді су үнемдеу технологияларын енгізуге ынталандыру мақсатында бірқатар шаралар жүзеге асырылуда. Атап айтқанда, ұңғымаларды бұрғылау, сондай-ақ тиісті жүйелерді сатып алу және орнату шығындарын өтеу үлесі 50%-дан 80%-ға дейін ұлғайтылған.

Сонымен қатар, тариф құнына байланысты суару суына субсидия берудің сараланған жүйесі енгізілді. Су үнемдеу технологияларын қолданған жағдайда өтемақы мөлшері 60%-дан 85%-ға дейін артады.

Министрліктің мәліметінше, қабылданған шаралардың арқасында су үнемдеу технологияларымен қамтылған алқаптардың жыл сайынғы көлемі 30–35 мың гектардан шамамен 150 мың гектарға дейін өсті. 2025 жылдың қорытындысы бойынша бұл көрсеткіш 543,5 мың гектарды құрап, 874 млн текше метр су үнемдеуге мүмкіндік берді.

Су ресурстарын тиімді пайдалану бойынша жұмыстар өнеркәсіп саласын да қамтиды. Жаңа Су кодексі кәсіпорындарды кезең-кезеңімен айналымдық және қайта пайдаланылатын сумен жабдықтау жүйелеріне көшіруді көздейді. Бұл талаптар орындалмаған жағдайда су пайдаланудың рұқсат етілген көлемін қысқарту қарастырылған.

Сондай-ақ су үнемдеу технологияларын енгізу қалалар мен ірі елді мекендерде де жүзеге асырылады. 2030 жылға қарай жасыл желектерді суару толықтай су үнемдеу технологияларына көшіріледі деп жоспарлануда.

Бұған дейін Алматы облысында жылына 300–500 дана жаңбырлатқыш машина шығаратын Valley ирригациялық техникасының өндірісін іске қосу жоспарланып отырғаны хабарланған болатын.