Жауын-шашын мен жоғары ылғалдылық Қазақстандағы егін жинау науқанын баяулатуы мүмкін

Тамыздың алғашқы онкүндігінде Қазақстанның негізгі астық егілетін өңірлерінде агрометеорологиялық жағдайлар егін жинау жұмыстарын жүргізуге қолайлы болады деп күтілуде. Алайда айдың екінші және үшінші онкүндіктерінде жауын-шашын мен ауа ылғалдылығының жоғары болуы елдің солтүстігінде, орталығында және шығысында астық жинау жұмыстарына қиындық туғызуы мүмкін. Қазгидрометтің мәліметінше, бұл өңірлерде жиі жауын-шашын негізінен тамыздың екінші жартысында күтіледі.

Тамыз айында республиканың басым бөлігінде орташа ауа температурасы климаттық нормадан 1°С-қа жоғары болады деп болжануда.

Батыс Қазақстан, Атырау, Маңғыстау және Солтүстік Қазақстан облыстарында, сондай-ақ Ақтөбе, Қостанай, Ақмола, Павлодар облыстарының басым бөлігінде және Қарағанды облысының солтүстік-батысында ауа температурасы климаттық нормаға жуық болады.

Республиканың басым бөлігінде тамыз айындағы жауын-шашын мөлшері норма шегінде күтіледі. Нормадан көп жауын-шашын Батыс Қазақстан, Ақтөбе және Ақмола облыстарының шеткі солтүстігінде, Қостанай облысының батысы мен солтүстігінде, Солтүстік Қазақстан облысының басым бөлігінде, Шығыс Қазақстан мен Абай облыстарының таулы және тау бөктеріндегі аудандарында, сондай-ақ Алматы облысы мен Жетісу облысының оңтүстік-шығысында болжанып отыр.

Нормадан аз жауын-шашын Маңғыстау облысының оңтүстік-шығысында, Ақтөбе облысының оңтүстігінде, Ұлытау облысының оңтүстік-батысында және елдің оңтүстік өңірлерінде күтіледі.

Елдің батысында тамыз айының басында ауа температурасының жоғарылауы болжанады. Жауын-шашын негізінен Ақтөбе облысында күтіледі. Айдың екінші жартысында кей жерлерде жаңбыр жауып, ауа температурасы аздап төмендейді, ал ай соңында көбіне құрғақ ауа райы орнайды.

Солтүстік өңірлерде жауын-шашын тамыздың екінші жартысында Қостанай, Солтүстік Қазақстан және Ақмола облыстарында жиі байқалады. Павлодар облысында жаңбыр айдың басында күтіледі. Күндізгі ауа температурасы кезең-кезеңімен жоғарылап және төмендеп отырады.

Орталық Қазақстанда жауын-шашын негізінен Қарағанды облысында айдың бірінші және екінші жартысында күтіледі. Температураның көтерілуі көбіне айдың алғашқы жартысында болжанады.

Елдің шығысында жер бедерінің ерекшеліктеріне байланысты ауа температурасының жиі ауытқуы күтіледі. Кей жерлерде жауын-шашын тамыздың бірінші және екінші жартысында болжанып отыр.

Қазгидрометтің есебіне сәйкес, тамыздың бірінші және екінші онкүндіктерінде астықтың ылғалдылығы 12–16%, сабанның ылғалдылығы 14–20% болады. Үшінші онкүндікте астықтың ылғалдылығы 13–17%, сабанның ылғалдылығы 15–20%, ал Солтүстік Қазақстан облысында сабанның ылғалдылығы 23%-ға дейін жетуі мүмкін.